შსს-ს საგანგებო სიტუაციების მართვის სააგენტოს განცხადებით, ბორჯომის ხეობაში აზერბაიჯანული ვერტმფრენი ცეცხლის ქრობის პროცესში ხვალ, დილიდან ჩაერთვება.

დღის განმავლობაში, სააგენტოში On.ge-ს განუცხადეს, რომ რთული რელიეფისა და გაკვამლიანების გამო, არ იყო ხილვადობა და გაჭირდა ქრობის პროცესი.

დაბა წაღვერის მახლობლად, ტყის მასივში გაჩენილი ხანძრის სალიკვიდაციო სამუშაოებში 250-მდე მეხანძრე-მაშველი მონაწილეობს.

უწყების ცნობით, ხანძრის სალიკვიდაციო სამუშაოებში, ასევე, ჩართულია 20-მდე მაღალი გამავლობის მძიმე ტექნიკა, 18 ხანძარსაწინააღმდეგო ტექნიკა, შსს-ს სასაზღვრო პოლიციის და კომპანია „თუშეთის“ ვერტმფრენები.

სააგენტოს ცნობით, საჰაერო ტექნიკა დღის განმავლობაში 104-ჯერ გაფრინდა და ცეცხლის კერებს 215 ტონა წყალი დაასხა. ხანძრის კერების მონიტორინგს საქართველოს საჰაერო ნავიგაციის ვერტმფრენი ახორციელებს.

მიუვალ ადგილებში, სხვადასხვა მიმართულებით, მძიმე ტექნიკის დახმარებით ექვს კილომეტრამდე გზა გაიჭრა.

წაღვერის ტყეში ხანძარი გუშინ საღამოს, 22 სექტემბერს გაჩნდა. იმავე ტყეში ხანძარი აგვისტოშიც იყო.

მაშინ გაჩენილი ხანძრის ჩაქრობას რვა დღე დასჭირდა. ხანძრის ჩაქრობაში საქართველოსა და მეგობარი ქვეყნების ტექნიკა, ავიაცია და მეხანძრე მაშველები მონაწილეობდნენ.