ოცნების ხელისუფლებამ ოცნების არჩეულ პრეზიდენტს, მიხეილ ყაველაშვილს აშშ-ში საქართველოს ელჩად თამარ ტალიაშვილის კანდიდატურა წარუდგინა. განკარგულებაა ოცნების ხელისუფლების მთავრობის ვებგვერდზეა გამოქვეყნებული.

"საქართველოს კონსტიტუციის 52-ე მუხლის პირველი პუნქტის "ა" ქვეპუნქტისა და "საქართველოს მთავრობის სტრუქტურის, უფლებამოსილებისა და საქმიანობის წესის შესახებ" საქართველოს კანონის მე-5 მუხლის "ღ" ქვეპუნქტის შესაბამისად, 2025 წლის 10 ივლისიდან ამერიკის შეერთებულ შტატებში საქართველოს საგანგებო და სრულუფლებიანი ელჩის თანამდებობაზე საქართველოს პრეზიდენტს დასანიშნად წარედგინოს თამარ ტალიაშვილის კანდიდატურა", — ნათქვამია განკარგულებაში, რომელსაც ხელს პრემიერმინისტრი ირაკლი კობახიძე აწერს.

თამარ ტალიაშვილი იყო თბილისის საკრებულოს წევრი და ქალაქ თბილისის მუნიციპალიტეტის საკრებულოს განათლებისა და კულტურის კომისიის თავმჯდომარე.

2017 წლიდან ის საქართველოს ადგილობრივ თვითმმართველობათა ეროვნული ასოციაციის ვიცე-პრეზიდენტის თანამდებობას იკავებდა .

2018 წლიდან იყო ევროპის საბჭოს ადგილობრივ და რეგიონალურ ხელისუფლებათა კონგრესის ვიცე-პრეზიდენტი.

2020-2022 წლებში თამარ ტალიაშვილი იყო საქართველოს მე-10 მოწვევის პარლამენტის წევრი, საარჩევნო ბლოკი: ქართული ოცნება — დემოკრატიული საქართველო.

2022 წლის ოქტომბერში დაინიშნა ევროპის საბჭოში საქართველოს მუდმივ წარმომადგენლად.