დიდი საკადრო ცვლილებების ოცნების ხელისუფლების შინაგან საქმეთა სამინისტროში 28 მაისის შემდეგ, უწყების ხელმძღვანელის, აშშ-ს მიერ მაგნიტცკის სიაში მოხვედრილი და ბრიტანეთის მიერ სანქცირებული ვახტანგ გომელაურის გადადგომის შემდეგ, დაიწყო.

უწყებამ აწ უკვე ყოფილი მინისტრის მიმართვა გაავრცელა, სადაც გომელაური წერდა, რომ "10 წელიწადზე მეტი ხნის განმავლობაში იკავებდა საქართველოს შინაგან საქმეთა მინისტრის, სახელმწიფო უსაფრთხოების სამსახურის უფროსისა და ვიცეპრემიერის თანამდებობებს" და "დღეს, როდესაც ქვეყანაში მშვიდი ვითარებაა, თავს უფლება მისცა და გუნდს სთხოვა თანამდებობის დატოვება".

იმავე დღეს, ოცნების ხელისუფლების პრემიერმა ბრიფინგი გამართა და საზოგადოებას ახალი შინაგან საქმეთა მინისტრი — გელა გელაძე წარუდგინა.

28 მაისსავე გავრცელდა ინფორმაცია, რომ თანამდებობას ტოვებდნენ საპატრულო პოლიციის დეპარტამენტის დირექტორი, ვაჟა სირაძე და განსაკუთრებულ დავალებათა დეპარტამენტის დირექტორი, ზვიად ხარაზიშვილი, თუმცა ეს ინფორმაცია უწყებამ მალევე უარყო.

9 ივნისს კიდევ ერთხელ დაწერეს მედიასაშუალებებმა, რომ ვაჟა სირაძემ საპატრულო პოლიციის დეპარტამენტის დირექტორი თანამდებობა დატოვა. ამის პარალელურად შსს-ის ვებგვერდზე საპატრულო პოლიციის დეპარტამენტის ხელმძღვანელად უკვე ლევან მაისურაძე იყო მითითებული.

რამდენიმე საათში შსს-მ საკადრო ცვლილებების შესახებ გაავრცელა ინფორმაცია. რომლის მიხედვითაც ვაჟა სირაძე თბილისის პოლიციის დეპარტამენტის დირექტორის თანამდებობაზე დაინიშნა. მისი ადგილი კი თბილისის საპატრულო პოლიციის დეპარტამენტის დირექტორის პოსტზე თბილისის პოლიციის დეპარტამენტის დირექტორის მოადგილემ, ლევან მაისურაძემ დაიკავა.

ამას გარდა, თანამდებობრივად ჩამოაქვეითეს ცენტრალური კრიმინალური პოლიციის დეპარტამენტის დირექტორი თეიმურაზ კუპატაძე და სსიპ დაცვის პოლიციის დეპარტამენტის თავმჯდომარედ დანიშნეს.

ცენტრალური კრიმინალური პოლიციის დეპარტამენტის დირექტორად ამავე დეპარტამენტის დირექტორის მოადგილე დავით კიკნაძე დანიშნეს.

თბილისის პოლიციის დეპარტამენტის დირექტორი ლაშა გოგნიაშვილი კახეთის პოლიციის დეპარტამენტის დირექტორად გადაიყვანეს.

კახეთის პოლიციის დეპარტამენტის დირექტორი თეიმურაზ კალანდაძე მცხეთა-მთიანეთის პოლიციის დეპარტამენტის დირექტორი გახდა.

ქვემო ქართლის პოლიციის დეპარტამენტის დირექტორად ლევან კვიციანი დაინიშნა.

ქვემო ქართლის პოლიციის დეპარტამენტის დირექტორი გურამ ნაცვლიშვილი სამცხე-ჯავახეთის პოლიციის დეპარტამენტის დირექტორი გახდა.

სამცხე-ჯავახეთის პოლიციის დეპარტამენტის დირექტორი რამაზ თათარაშვილი იმერეთის პოლიციის დეპარტამენტის დირექტორად დაინიშნა.

იმერეთის პოლიციის დეპარტამენტის დირექტორი ზაზა ცხაკაია გურიის პოლიციის დეპარტამენტის დირექტორად დაინიშნა;

შიდა ქართლის პოლიციის დეპარტამენტის დირექტორად თბილისის პოლიციის დეპარტამენტის დირექტორის მოადგილე კახაბერ მურადაშვილი დაინიშნა;

ოცნების ხელისუფლების შინაგან საქმეთა სამინისტროს ცნობით, უწყებაში მიმდინარე საკადრო ცვლილებები სისტემის კიდევ უფრო მეტად გაძლიერებასა და განვითარებას ემსახურება.

შეგახსენებთ, რომ ვაჟა სირაძე სანქცირებულია ჩეხეთისა და სამი ბალტიის ქვეყნის — ლიეტუვის, ლატვიისა და ესტონეთის მიერ.

არასამთავრობო ორგანიზაცია საერთაშორისო გამჭვირვალობა-საქართველოს ცნობით, თეიმურაზ კუპატაძეს ლიეტივისგან, ლატვიასა და ესტონეთისგან სავიზო და სამოგზაურო შეზღუდვები აქვს დაწესებული.