გატაცებული აფგან მუხტარლის ცოლი, ასევე ჟურნალისტი ლეილა მუსტაფაევა და მეგობარი, აზერბიჯანელი პოლიტიკური აქტივისტი დაშგინ აღალარლი მათზე შესაძლო თვალთვალის კადრებს აქვეყნებენ. მუხტარლისა და მისი ოჯახის ინტერესების დამცველი, არჩილ ჩოფიკაშვილი აცხადებს, რომ მუსტაფაევასა და აღალარლის მიმართ, შესაძლოა, ახალი დანაშაული მზადდებოდეს.

ფოტო 1: აფგან მუხტარლი / ფოტო 2: ლეილა მუსტაფაევა

ლეილა მუსტაფაევას თქმით, თვალთვალი ორ აგვისტოს, აზერბაიჯანის შს-ს მინისტრის ვიზიტის დროს დაიწყო და დღემდე გრძელდება. მისივე თქმით, თვალთვალის ამსახველი ფოტო-ვიდეომასალა პროკურატურას წარუდგინეს, მაგრამ, მისი თქმით, ამას შედეგი არ მოჰყოლია.

ადვოკატი ჩოფიკაშვილი ამბობს, რომ თვალთვალის საქმესთან დაკავშირებით პროკურატურამ მხოლოდ ლეილა მუსტაფაევა დაკითხა. მისივე თქმით, მუხტარლის გატაცებამდე ანალოგიური თვალთვალი მიმდინარეობდა:

"ლეილა მუსტაფაევა ჟურნალისტია და იძიებს აზერბაიჯანის ხელისუფლების წევრების ბიზნეს საქმიანობას საქართველოში ხოლო, დაშგინ აღალარლი აზერბაიჯანელი აქტივისტია. ქართველ სამართალდამცავთა უმოქმედობა ნოყიერ ნიადაგს ქმნის აფგან მუხტარლის გატაცების მსგავსი ქმედებებისთვის შემდგომში და ამ ფონზე განსაკუთრებით დაუცველად გრძნობენ თავს დაზარალებულები."

მეოთხე თვეა, თბილისიდან გატაცებული აზერბაიჯანელი გამომძიებელი ჟურნალისტი, აფგან მუხტარლი ბაქოს ციხეში იმყოფება და წინასწარი პატიმრობა აქვს მისჯილი. აზერბაიჯანის ხელისუფლება ჟურნალისტს სახელმწიფო საზღვრის უკანონოდ გადაკვეთას და კონტრაბანდას ედავება. თავად მუხტარლი კი ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს.

საქართველოში შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს. აფგან მუხტარლის და ლეილა მუსტაფაევას საქმეს განიხილავს ევროპის ადამიანის უფლებათა დაცვის საერთაშორისო სასამართლო საქმეს მინიჭებული აქვს პრიორიტეტი.