საქართველოს ვიზიტით ევროპის უსაფრთხოებისა და თანამშრომლობის ორგანიზაციის (OSCE) გენერალური მდივანი ფერიდუნ სინირლიოღლუ ეწვია — ამის შესახებ ინფორმაციას ოცნების ხელისუფლების საგარეო საქმეთა სამინისტრო ავრცელებს.

მათი ცნობით, OSCE-ს გენერალური მდივანი 22 აპრილს ქართული ოცნების საგარეო საქმეთა მინისტრს, მაკა ბოჭორიშვილს შეხვდება, რის შემდეგაც მაკა ბოჭორიშვილი და ფერიდუნ სინირლიოღლუ პრესასთან ერთობლივ განცხადებას გააკეთებენ.

"დაგეგმილია ეუთოს გენერალური მდივნის შეხვედრები საქართველოს აღმასრულებელი და საკანონმდებლო ხელისუფლების უმაღლესი თანამდებობის პირებთან," — ვკითხულობთ განცხადებაში.

უწყების ცნობით, ვიზიტის ფარგლებში, ფერიდუნ სინირლიოღლუ, ასევე საოკუპაციო ხაზთან მდებარე სოფელ ოძისს ეწვევა და ადგილზე გაეცნობა არსებულ ვითარებას.