სტატია შეიცავს სპოილერებს სერიალზე The Last of Us

ორწლიანი ლოდინის შემდეგ, HBO-ს სერიალი The Last of Us ნანატრი მეორე სეზონით დაგვიბრუნდა და პირველივე სერიით დაგვიმტკიცა, რომ თავის საფუძველს არ ღალატობს და კიდევ უფრო ღრმად გვიჩვენებს პოსტ-აპოკალიფსური სამყაროს დისტოპიური რეალობის თავისებურებებს.

სერია მოულოდნელობით, თუმცა ბუნებრივად იწყება, ზუსტად იქიდან, სადაც პირველი სეზონი დასრულდა. რამდენიმე დაძაბული წუთის შემდეგ, სადაც ვიგებთ, რომ აჯანყებულთა დაჯგუფება "ციცინათელები" ჯოელზე შურისძიებას გეგმავს, სცენარში "დროში ხტომა" ხდება. მაყურებელი მაშინვე გრძნობს, რომ დრო გავიდა, პერსონაჟები კი შეიცვალნენ — განსაკუთრებით ელი, რომლის შინაგანი მდგომარეობა უკვე თვალშისაცემია. სერია ხაზს უსვამს არა მხოლოდ პოსტაპოკალიფსური სამყაროს სიმძიმეს, არამედ იმ ემოციურ დაძაბულობას, რომელიც პერსონაჟებს ერთმანეთთან აკავშირებს... ან აშორებს.

თამაში და ვიზუალი

ბელა რემზი ისევ საოცრად ასრულებს ელის როლს — გოგო, რომელიც ჯოელმა, ფაქტობრივად, იშვილა, ახლა უკვე უფრო სერიოზული, გულჩათხრობილი და მეტად დაფიქრებულია. სერიაში ჩანს ახალი პერსონაჟიც, დინა, რომელიც ელის საუკეთესო მეგობრის როლში გვევლინება. ვიზუალურად სერიალი ისევ იმ მაღალი ხარისხით არის შესრულებული, რაც HBO-ს სჩვევია — პოსტ-აპოკალიფსური სამყარო ცოცხალი, მძიმე და გასაოცარი დეტალებით სავსეა. სერიაში იმ ჟირაფებს კიდევ ერთხელ ვხედავთ, რომლებმაც წინა სეზონიდან დაგვამახსოვრეს თავი.

სერიალის შემქმნელები მტკიცედ მისდევენ The Last of Us-ის ვიდეოთამაშის მეორე ნაწილში მოთხრობილი ისტორიის ხაზს, თუმცა სერიალის ფორმატში დამატებით სიღრმესა და ემოციურ ფენებსაც გვთავაზობენ. მეორე სეზონის პირველი სერია ინტიმურია, თითქოს პერსონაჟების გულებში გვახედებსო. მოქმედება შედარებით ნელ ტემპში ვითარდება, მაგრამ ეს აშკარად მიზანმიმართულია — სერიალი ნელ-ნელა აგებს ახალ კონფლიქტებსა და დაძაბულობას.

ჯოელი თინეიჯერი გოგოს მამის როლში

მიუხედავად იმისა, რომ ჯოელი სერიაში ბევრს არ ამბობს, მისი არსებობა თითქმის ყოველ კადრში იგრძნობა. ჯოელი, რომელიც წინა სეზონში მძიმედ დაშავდა და ელის გადარჩენა მაინც შეძლო, ახლა თავის ძმასთან, ტომისთან და ელისთან ერთად ცხოვრობს ქალაქში, რომელიც ინფიცირებულებისგან გადარჩენილებმა ერთობლივი ძალისხმევით ააგეს. სერიის მსვლელობისას ვხედავთ, რომ ჯოელის პერსონაჟი იცვლება — თითქმის ვერ იცნობთ იმ უტყვ, უემოციო ადამიანს, რომელიც წინა სეზონში ელიმ "გატეხა" და თავის გრძნობებზე აალაპარაკა. ჯოელი ცდილობს, ქალაქისთვის სასარგებლო იყოს, თავისი ძმის ოჯახთან კარგი ურთიერთობა აქვს, ფსიქოლოგთანაც კი დადის, თუმცა ის, რასაც ჯოელი ყველაზე მეტად ცდილობს, თავის შვილობილთან საერთო ენის გამონახვაა. მისი ქმედებები პირველი სეზონის ფინალიდან ნელ-ნელა იღებს მძიმე, ტრაგიკულ და გარდაუვალ სახეს. ვხედავთ, რომ ჯოელი ნანობს, ელი რომ მოატყუა, თუმცა იცის, რომ მის გადასარჩენად სხვა გზა არ არსებობდა. მართალია, ელისა და ჯოელს შორის სიყვარულს კიდევ ვხედავთ, თუმცა ეს სიყვარული ახლა დაძაბულობის, უთქმელი სიტყვებისა და საეჭვო მომავლის ჩრდილქვეშ იმალება.

შურისძიება იწყება

როგორც ზემოთ ვახსენე, მაყურებელი სერიის დასაწყისშივე იგებს იმას, რაც მეხსიერებაში მაშინვე ილექება — ჯოელის ქმედებებს უკვალოდ არ ჩაუვლია, მას სასიკვდილო საფრთხე ემუქრება. ვხედავთ ახალ პერსონაჟს, ების, რომელიც დაუყოვნებლივ ტოვებს ცივი, მაგრამ მტკიცე ადამიანის შთაბეჭდილებას. მისი მომნუსხველი ძალა და ჩუმი, თითქმის გამყინავი აურა უკვე მეტყველებს, რომ ამ სეზონში ის ერთ-ერთი ცენტრალური ფიგურა იქნება. ების შურისძიების მოტივი ამოძრავებს — მისი გეგმის შესახებ დეტალებს სერიალის ავტორები ჯერ ბოლომდე არ გვიხსნიან, მაგრამ უკვე აშკარაა, რომ ჯოელი მისი სამიზნეა.

ინფიცირებულები უფრო საშიშები ხდებიან

და, სერიის მთავარი სიახლე: ახალი ტიპის ინფიცირებულები! მეორე სეზონში პირველად ვხედავთ შორიდან ამოუცნობ ქმნილებებს, რომლებიც უცნაურად მოძრაობენ და კლასიკურ "კლიკერებზე" უფრო ჩუმები, მოულოდნელები და ბევრად, ბევრად მოქნილები არიან. მათი ყურებისას გვექმნება მოლოდინი, რომ პოსტ-აპოკალიფსური გარემო ახლა უფრო მტრულია, ვიდრე წინა სეზონში. ინფიცირებულთა ევოლუციის შესახებ რეჟისორი ბრწყინვალედ გვამცნობს კადრებში — ჩუმი დერეფნები, დაძაბული სიჩუმე და ის მომენტები, როცა გული გიჩერდება, ამ ეპიზოდში უხვადაა.

საერთო ჯამში, სეზონის პირველი სერია ნათლად აჩვენებს, რომ ეს ისტორია შურისძიებას, ტკივილს და ფსიქოლოგიურ ბრძოლას მიეძღვნება.

იხილეთ ასევე:

• ბელა რემზის აუტიზმის დიაგნოზი Last of Us-ის გადასაღებ მოედანზე დაუსვეს
• GOT-ის და The Last of Us-ის რეჟისორი — ცნობილია, ვინ იმუშავებს ჰარი პოტერის სერიალზე