ქართული ოცნების დეპუტატი, ირაკლი ზარქუა საზოგადოებრივი მაუწყებლის ეთერში თეა წულუკიანის კომენტარს ეხმაურება. ზარქუას განცხადებით, წულუკიანმა იგულისხმა, რომ ანწუხელიძე გმირია, რომელიც "საქართველოს წინააღმდეგ პუტინისა და სააკაშვილის მიერ ორგანიზებულ ომში" მონაწილეობდა.

ზარქუამ განცხადებაში წულუკიანის სახლთან ჩატარებული აქციის მონაწილეებს "უსამშობლოები", "ორკები" უწოდა და აქცია "ინკვიზიციას" შეადარა.

"ქალბატონმა თეამ გუშინ განცხადება გააკეთა, რაც გულისხმობდა, რომ, რა თქმა უნდა, ანწუხელიძე გმირია, ისევე, როგორც ყველა ის ადამიანი, ვინც მონაწილეობდა პუტინისა და სააკაშვილის მიერ ორგანიზებულ ომში საქართველოს წინააღმდეგ. ქალბატონმა თეამ ის ბრძანა, ეს ომი რომ არ ყოფილიყო, დღეს ჩვენი ის გმირები, რომლებითაც ვამაყობთ, ყველანი სახლში იქნებოდნენ, თავის ოჯახებში იქნებოდნენ.

თუმცა ამ უსამშობლოებს აქვთ სხვა დაკვეთა. დააკვირდით, ეტყობა რაღაც ჩათი აქვთ, ეს უსამშობლოები ხომ პოულობენ ერთმანეთს, ამათ პატრონები ჰყავთ და უგდებენ ერთმანეთს ერთსა და იმავე თემას, აბა, ახლა ამას თავს დავესხათ. ამ უსამშობლოებს ერთი და იგივე ტექსტი აქვთ თითქმის. ეს არის ხელმარჯვნივ, ის ქმედება, ის მივარდნა. შემდეგ იმ ახალგაზრდებს, დაფინანსებულებს, ბუნებრივია, აძლევენ კონკრეტულ მისამართს, როგორ შეიძლება მოუწყონ ინკვიზიცია, როგორ შეიძლება შეურაცხყოფა მიაყენონ, მცირეწლოვანი შვილი ჰყავს. არ აინტერესებთ, ორკები არიან, ეს არის ამათი ხელწერა.

ეს კიდევ ერთხელ ცხადყოფს ქართული საზოგადოებისთვის, რომ ამათი ხელისუფლებაში დაბრუნება მტრისას, არავის არ დაინდობენ, გადათელავენ", — განაცხადა ზარქუამ წერილობით კომენტარში, რომელსაც პირველი არხი ავრცელებს.

შეგახსენებთ, ოცნების პარლამენტის, ვიცე-სპიკერმა, თეა წულუკიანმა, 11 აპრილს საზოგადოებრივი მაუწყებლის ეთერში განაცხადა, რომ 2008 წლის ომში გმირულად დაღუპული გიორგი ანწუხელიძე "უაზროდ შეეწირა ვიღაცის პიარს".

ასევე იხილეთ: