ოცნების პარლამენტის ვიცე-სპიკერის, ნინო წილოსანის თქმით, "სახედაკარგული და სინდისგაყიდული ადამიანები" აპროტესტებენ ადამიანების მსვლელობას 9 აპრილის მემორიალთან და "მათი იქ ყოფნა და ის აგრესია, რასაც ისინი აფრქვევენ არაფრით განსხვავდება რუსული ტანკებისგან, რომელმაც 9 აპრილის უმძიმეს დღეს გადაუარეს ქართველებს".

"სახედაკარგული და სინდისგაყიდული ადამიანები, მათ შორის, რუსეთში მომღერალი ბანი და ნაცების რეჟიმის ჯალათები აპროტესტებენ ადამიანების მსვლელობას 9 აპრილის მემორიალთან და ამ დღეს კიდევ ერთხელ იყენებენ იმისთვის, რომ დაპირისპირება და შუღლი ჩამოაგდონ ჩვენს საზოგადოებაში. მათი იქ ყოფნა და ის აგრესია, რასაც ისინი აფრქვევენ არაფრით განსხვავდება რუსული ტანკებისგან, რომელმაც 9 აპრილის უმძიმეს დღეს გადაუარეს ქართველებს. სწორედ ეს ადამიანები, ვინც დღეს ამ უმსგავსობას ჩადიან, თავიანთი ბოროტებით და მავნებლური მიზნებით ფეხქვეშ თელავენ ამ ქვეყნის ინტერესებს და ამ ქვეყნის საზოგადოებას", — განაცხადა ნინო წილოსანმა ტვ იმედთან.

მისივე თქმით, "ნაციონალური მოძრაობა თავისი ნაწილაკებით" აუცილებლად უნდა აიკრძალოს და ანტიკონსტიტუციურად იქნას ცნობილი.

"ყოველდღე ვხედავთ და ვუსმენთ უფრო და უფრო მეტ სასოწარკვეთილ განცხადებებს, მათ შორის, იმედგაცრუებულ პოსტებს, ერთმანეთისთვის შემოძახილებს, რომ როგორღაც არ დაიშალონ მარტივ მამრავლებად, თუმცა ამ პროცესის პარალელურად მეტი ე.წ. ექსტრემალი ტოვებს თავის პარტიის რიგებს. რა თქმა უნდა, პარტიასაც ვეღარ ვუწოდებთ ამ ექსტრემალების დაჯგუფებას, რომელთა მიზანი პირდაპირ ცდება ყველანაირ დემოკრატიულ სტანდარტებს. პარტიები და პარტიებად წოდებული ადამიანები, როდესაც არ იღებენ მონაწილეობას არც საპარლამენტო მუშაობაში, არც არჩევნებში და მხოლოდ და მხოლოდ დესტრუქციაზე არიან გადასული ისინი ნამდვილად ვერ იქნებიან პოლიტიკოსები, ამიტომ, თუ ამ ექსტრემისტების ჯგუფს უფრო და უფრო მეტი მათი ნაწილი გამოაკლდება, რა თქმა უნდა, ქვეყანა უფრო დამშვიდდება და პრინციპში აქეთ მიდის პროცესები. მათ შორის, იმის გათვალისწინებით, რომ საგამოძიებო კომისიის პირობებში ალბათ ყველასთვის ცხადია, რომ ეს პარტია, ნაციონალური მოძრაობა თავისი ნაწილაკებით იმ დაშლის პირობებში, როგორი ფორმაც ახლა აქვთ მიღებული აუცილებლად უნდა აიკრძალოს და ანტიკონსტიტუციურად იქნას ცნობილი. ამ პირობებში ვფიქრობ, რომ პოლიტიკური ველი გაიწმინდება და ამ პოლიტიკური ველის გაწმენდის პროცესს ვადგავართ", — განაცხადა ნინო წილოსანმა.