"ნუ გვაშინებენ ამ სანქციებით, არც კაია კალასს და არავის მიეცემა შესაძლებლობა, საქართველოს ინტერესები ფეხქვეშ გათელონ", — ამის შესახებ დედაქალაქის მერმა ევროკავშირის უმაღლესი წარმომადგენლის საგარეო საქმეთა და უსაფრთხოების საკითხებში, კაია კალასის განცხადების საპასუხოდ განაცხადა.

"ნუ გვაშინებენ ამ სანქციებით. ჩვენ ვიცავთ ჩვენს ქვეყანას, ჩვენი ქვეყნის ინტერესებს. კაია კალასი ქართველი ხალხის უფროსი ვერ იქნება. ზემოდან ყურება და მბრძანებლობა ვისთანაც გასდით, იმათთან გაუვიდეთ. არც კაია კალასს და არავის მიეცემა იმის შესაძლებლობა, რომ საქართველოს ინტერესები გამოყენებული იყოს თავიანთი ქვეყნის ინტერესების გასატარებლად და ჩვენი ქვეყნის ინტერესები გათელილი იყოს ფეხქვეშ, როგორც ეს სხვა ქვეყნის შემთხვევაში გააკეთეს.

კაია კალასი და მსგავსი ტიპის ჩინოვნიკები არიან უმცირესობაში, უმცირესობაში არიან რადიკალები, ვითომ პოლიტიკური პარტიები. ყველას მოუწევს, რომ ამ ყველაფერს შეეგუოს. ჩვენი ქვეყნის უმრავლესობამ მხარი დაუჭირა ქართულ ოცნება დემოკრატიულ საქართველოს", — აღნიშნა კახა კალაძემ.

ცნობისათვის, ევროკომისარ კაია კალასის წერილში ნათქვამია, რომ ევროკავშირის მუშაობს, იმ პირებისთვის სანქციების დაწესებაზე, ვინც პასუხისმგებელია მშვიდობიანი საპროტესტო აქციების მონაწილეების წინააღმდეგ ძალადობაზე.

"2024 წლის 16 დეკემბრის საგარეო ურთიერთობათა საბჭოზე უმაღლესმა წარმომადგენელმა/ვიცე-პრეზიდენტმა შესთავაზა სანქციების დაწესება საქართველოს იმ მოქალაქეების მიმართ, რომლებიც პასუხისმგებელნი არიან, ჩართულნი ან ასოცირდება ადამიანის უფლებების სერიოზულ დარღვევებთან, ადამიანის უფლებათა გლობალური სანქციების რეჟიმის პირობებში.

მიუხედავად იმისა, რომ ჯერ ვერ მოხერხდა ყველა წევრი სახელმწიფოს მიერ შეთანხმების მიღწევა, დისკუსიები გრძელდება. ევროკავშირის სანქციების შესახებ ყველა გადაწყვეტილება მიიღება ერთხმად საბჭოში წევრი სახელმწიფოების მიერ", — წერს კალასი. წერილის შესახებ ინფორმაციას ტვ პირველი ავრცელებს.