დღეს, 22:00 საათზე საზოგადოებრივმა მაუწყებელმა პირობა შეასრულა და ეთერი თეატრალური უნივერსიტეტის სტუდენტებს დაუთმო.

ნინი გოგიამ და თემო ვაჭარაძემ თეატრალურ უნივერსიტეტში არსებულ საპროტესტო ტალღაზე, ეთიკის კომისიის მიერ მათთვის სტუდენტის სტატუსის შეწყვეტასა და ბოლო პერიოდში მათი უნივერსიტეტის ირგვლივ განვითარებულ მოვლენებზე ისაუბრეს. უნივერსიტეტის რექტორი გიორგი შალუტაშვილი კი გადაცემის მიმდინარეობისას პირდაპირ ეთერში ჩაერთო.

თემო ვაჭარაძემ გადაცემის მიმდინარეობისას ეთიკის კომისიის წევრებზე ისაუბრა და თქვა, რომ თეატრალური უნივერსიტეტის ეთიკის კომისიის წევრმა, გიორგი ფხაკაძემ მათ "სუნიანები" უწოდა, პატიმრების ბანერებს კი – "ძონძები".

"ეთიკის კომისიაში შედის 7 ადამიანი და აქედან 5-მა მოაწერა ხელი ჩვენთვის სტატუსის შეჩერებას. აქედან ერთი არის გიორგი ფხაკაძე, რომელიც იყო უნივერსიტეტში რამდენჯერმე მოსული. ერთხელ იყო სიტყვიერი დაპირისპირება სტუდენტებსა და მას შორის. ის მოსული იყო სადეზინფექციო პრობლემების გამო და გვიწოდა "სუნიანები" და გვითხრა, რომ უნივერსიტეტში რწყილები შემოვიყვანეთ. პატიმრების ბანერებს კი "ძონძები" უწოდა და ამ ადამიანმა მიიღო ჩვენი გაგდების გადაწყვეტილება", – თქვა თემო ვაჭარაძემ საზოგადოებრივი მაუწყებლის ეთერში.

ნინი გოგიას თქმით, თავიდან თუ ისინი თვლიდნენ, რომ სტატუსი არ უნდა შესწყვეტოდათ, ახლაც ასე თვლიან და არ იღებენ არც გაფრთხილებას, რადგან "ეს ქმედება სრულიად დაუსაბუთებელი და არალოგიკურია".

"დასაბუთებას ვიდრე არ მივიღებთ, მანამდე, რა თქმა უნდა, არ ვაპირებთ, თუნდაც ლექციებზე შევიდეთ, რადგან ეს ყველაფერი ეწინააღმდეგება, პირველ რიგში, კანონს და, მეორე რიგში, ჩვენს მორალს, რაც ყველაზე მაღლა დგას", – განაცხადა გოგიამ.

გიორგი შალუტაშვილმა განაცხადა, რომ სტუდენტებს სტატუსი აღუდგათ, მზადაა მათთან დიალოგისთვის და მისთვის მთავარია, რომ უნივერსიტეტში სასწავლო პროცესი აღდგეს.

"მე ვფიქრობ, დღეს არის უკვე აუცილებლობა დიალოგის. ჩვენ ერთად უნდა გავაგრძელოთ თანაარსებობა, ჩვენ უნდა გავაგრძელოთ თანამშრომლობა, ჩვენ უნდა გავაგრძელოთ სწავლა და, რასაკვირველია, მე მზად ვარ, გავითვალისწინო და გაგებით მოვეკიდო სტუდენტების ყველა წინადადებას, რომელიც არ შეზღუდავს სხვების თავისუფლებას. ეს არის არამხოლოდ ჩემი პირადი მზაობა და მე ველოდები ყველა სტუდენტს, ყველა პედაგოგ მასწავლებელს, რომ სწორედ ამ სულისკვეთებით გავაგრძელოთ ურთიერთობა. მე გუშინწინ განვაცხადე ერთი რამ, რომ ჩვენ გვინდა, დავიწყოთ ყველაფერი სუფთა ფურცლიდან და მე ჩემს პირობას ვასრულებ. მე მზად ვარ, ყოველგვარი წინაპირობების და ყოველგვარი, ასე ვთქვათ, წინააღმდეგობის გარეშე მივიღო სტუდენტების ყველა კითხვა და ყველა პრობლემურ საკითხზე დავიწყოთ მსჯელობა. ჩვენ გვაქვს ამის სივრცე. ჩვენ გვაქვს ჩვენი ტელევიზია, სადაც შესაძლებელია, რომ გავხსნათ, გნებავთ, სადისკუსიო კლუბი სტუდენტებისთვის", – განაცხადა შალუტაშვილმა.

ამის მიუხედავად, სტუდენტები ამბობენ, რომ მათი მოთხოვნები უცვლელი რჩება და კვლავ მოითხოვენ რექტორის გადადგომას, პროევროპულ აქციებზე დაკავებულთა გათავისუფლებას და ხელახალი არჩევნების დანიშვნას.

"ჩვენი იქ მისვლის მიზანი იყო, რომ ყველაფერს თავის სახელი დარქმეოდა. იმედია, ჩვენ ეს შევძელით. მინდა მივმართო გიორგი შალუტაშვილს, დაჯდეს კომისიის წევრებთან ერთად და დაფიქრდეს იმაზე, თუ რას გააკეთებს ამის შემდეგ. დარწმუნებული ვარ ახლა ფიქრობენ, როგორ წაიღონ თავის ქმედებები უკან.

ბატონო გიორგი შალუტაშვილო, ჩვენ ვერ დაგვამარცხებ. განა მარტო იმიტომ, რომ ახალგაზრდები ვართ. იმიტომ, რომ მართლები ვართ", — თქვა თემო ვაჭარაძემ საზოგადოებრივი მაუწყებლის პირდაპირი ეთერიდან გამოსვლის შემდეგ.