ასეულობით სტუდენტმა ბელგრადში საზოგადოებრივი მაუწყებლის (RTS-ის) შენობის შესასვლელები გადაკეტა. ანალოგიურ ბლოკადას დემონსტრანტებმა მიმართეს სერბეთის სიდიდით მეორე ქალაქ ნოვი სადშიც.

სტუდენტები, რომლებიც სერბეთის მთავრობის გადადგომას ითხოვენ, აცხადებენ, რომ შესასვლელები გადაკეტილი იქნება, სულ მცირე, 22 საათის განმავლობაში.

დემონსტრანტებმა პროტესტის ამ ფორმას მიმართეს მას შემდეგ, რაც ორშაბათის ახალი ამბების გამოშვებას ქვეყნის პრეზიდენტი ალექსანდარ ვუჩიჩი ესტუმრა. მან ეთერში შეურაცხყოფა მიაყენა სტუდენტებს, და განაცხადა, რომ მასობრივი დემონსტრაციების გამო არ გადადგება. ვუჩიჩმა გააფრთხილა დემონსტრანტები, რომ შაბათს დაგეგმილ აქციაზე მათ წინააღმდეგ ძალა იქნება გამოყენებული. გადაცემის წამყვანმა სტუდენტები "ბრბოდაც" მოიხსენია.

სერბეთში პროტესტებს თითქმის ყოველდღიური ხასიათი აქვს მას შემდეგ, რაც რკინიგზის სადგურის ჭერის ჩამონგრევას 15 ადამიანის სიცოცხლე ემსხვერპლა — მოსახლეობა მთავრობას კორუფციულ გარიგებებში ადანაშაულებს და მოითხოვს პოპულისტი პრეზიდენტი ალექსანდარ ვუჩიჩის გადადგომას.

RTS-მა განცხადება გამოაქვეყნა, რომელშიც დაგმო სტუდენტების საქციელი.

"RTS-ის თანამშრომლებისათვის სამსახურში მოსვლის შესაძლებლობის იძულებით წართმევა სახიფათო ნაბიჯია კონფლიქტებისკენ, რომელთაც განუსაზღვრელი შედეგი ექნება", — ვკითხულობთ განცხადებაში.