საქართველოს ექს-პრეზიდენტი და ოდესის ყოფილი გუბერნატორი, მიხეილ სააკაშვილი პოლონეთიდან უკრაინის საზღვარზე რამდენიმე საათში ჩავა. მოქალაქეობის გარეშე დარჩენილი სააკაშვილის შესახებ საქართველოს პარლამენტის დეპუტატებისა და ქართული ოცნების ლიდეთა ნაწილი მოკლე კომენტარებს აკეთებენ და ძირითადად, აღნიშნავენ, სააკაშვილის საკითხი არ აინტერესებთ.

ირაკლი კობახიძე - პარლამენტის თავმჯდომარე

ჩვენ პოლიტიკური ინტერესი ამ კუთხით არ გვაქვს, გამომდინარე იქიდან, რომ მიხეილ სააკაშვილმა დაკარგა პოლიტიკური აქტუალობა. დანარჩენი არის სამართლებრივი მხარე სამართლებრივი მხარით უნდა დაინტერესდნენ შესაბამისი ორგანოები.

თამარ ჩუგოშვილი - პარლამენტის თავმჯდომარის მოადგილე

მე დიდი ინტერესი არ მაქვს ამ თემის მიმართ. ეს არის უკრაინის მხარე, რომელსაც თავისი კანონმდებლობა აქვს და მოიქცევიან, ალბათ, თავიანთი კანონმდებლობის შესაბამისად.

ვიქტორ დოლიძე - სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში

მიხეილ სააკაშვილზე გთხოვთ ნურაფერს მკითხავთ, ის ჩემთვის არარელევანტური პიროვნებაა. ის არის გასული ეპოქა, ის არის ქვეყნის გავლილი ისტორია. ამიტომ მიხეილ სააკაშვილი ჩემთვის ნაკლებად საინტერესოა, ბევრად უფრო მნიშვნელოვანი საქმეები და საფიქრალი მაქვს, ვიდრე მიხეილ სააკაშვილი.

კახი კალაძე - თბილისის მერობის კანდიდატი

გულწრფელად გეტყვით, არ მაინტერესებს სააკაშვილი სად წავა და სად წამოვა. მე როგორც ვიცი ის ბრალდებულია და შესაბამისად, შესაბამისი უწყებები იმოქმედებენ კანონმდებლობის ფარგლებში.

მამუკა მდინარაძე - საპარლამენტო უმრავლესობის წევრი

ეს კაცი არის წარსული, ძალიან ცუდად ახსენდება საქართველოს თითოეულ მოქალაქეს, ამიტომ ამაზე დამატებითი აჟიოტაჟი აბსოლუტურად ზედმეტია.