ალტ-ინფოს და კონსერვატორების წარმომადგენლები — გიორგი ქარდავა და ზურა მახარაძე, "კონსერვატორების" ფეისბუქ-გვერდზე ვიდეოს ავრცელებენ, სადაც ქართული ოცნების საგარეო კურსზე საუბრობენ.

გიორგი ქარდავა ამბობს, რომ "დასავლეთი აქედან მიდის" და "ხელისუფლება შეეცდება ეს ვაკუუმი ავტორიტარული მიმართულებით წაიყვანოს".

გიორგი ქარდავა: "დასავლეთი, ჩათვალე, აქედან მიდის. საერთოდ ჩვენთვის არავის არ ეცლება. ხელისუფლების შესაძლებლობების დაბალანსების საპირწონე რაღაცა მძლავრი ძალა გაქრება დასავლეთის სახით. ცუდი იყო თუ კარგი იყო, მაგას რა მნიშვნელობა აქვს, მაგრამ ფაქტია — ეგ აბალანსებდა ხელისუფლების, აი, ამ უკუჩვენებებს, როგორც გამოჩნდა. ანუ ხელისუფლება თურმე "მორჩილი", რომ იყო და აქამდე ასეთ რაღაცებს არ აკეთებდა იმიტომ არ აკეთებდა, რომ დასავლეთის ეშინოდა, თურმე. როგორც კი დასავლეთის ფაქტორი ახლა დაიჩრდილა და სულ უფრო და უფრო გაქრება — ხელისუფლება შეეცდება ეს ვაკუუმი ავტორიტარული მიმართულებით წაიყვანოს".

ალტ-ინფოს ლიდერ ზურა მახარაძის თქმით, ოცნების ხელისუფლებამ "პროქართული ანტიგლობალისტური კანონმდებლობის მიღება კი არ დაიწყო, "თვითონ ხდებიან დრაკონები".

ზურა მახარაძე: "ანუ პროქართული ანტიგლობალისტური კანონმდებლობის მიღება კი არ დაიწყეს — თვითონ ხდებიან დრაკონები". (სტილი დაცულია)

შეგახსენებთ, 3 მარტს ესტონეთის საგარეო საქმეთა სამინისტროს ვებგვერდზე საქართველოს 55 მოქალაქის სანქცირების შესახებ ინფორმაცია გამოქვეყნდა, რომელშიც მედიაპლატფორმასთან და პოლიტიკურ მოძრაობა Alt-Info-სთან ასოცირებული პირები: ზურაბ მახარაძე და კონსტანტინე მორგოშიაც მოხვდნენ.