რუმინეთის პოლიციამ რუსეთის დახმარებით ხელისუფლების დამხობის მცდელობის ბრალდებით 6 პირი დააკავა, ერთ-ერთი მათგანი, რომლის სახლიც გაჩხრიკეს, 101 წლის გადამდგარი გენერალ-მაიორია.

6-ივე ბრალდებული დააკავეს 5 მარტს, მას შემდეგ, რაც რუმინეთმა რუსეთის საელჩოს სამხედრო ატაშე და მისი მოადგილე პერსონა ნონ გრატებად გამოაცხადა.

ოფიციალურმა მოსკოვმა განაცხადა, რომ ეს ნაბიჯი პასუხგაუცემელი არ დარჩება.

"კრიმინალური ჯგუფის წევრები რეგულარულად უკავშირდებოდნენ უცხოური ძალების აგენტებს, რომლებიც რუმინეთსა და რუსეთის ფედერაციაში იმყოფებოდნენ", — განაცხადა პროკურატურამ.

რუმინეთის დაზვერვის სააგენტომ განაცხადა, რომ გაძევებული რუსი დიპლომატები აგროვებდნენ ინფორმაციას სტრატეგიული მნიშვნელობის ადგილებში და ხელს უწყობდნენ ჯგუფის ანტიკონსტიტუციურ ნაბიჯებს.

პროკურატურის განცხადებით, ჯგუფს სამხედრო სტრუქტურა ჰქონდა და მისი ერთ-ერთი ლიდერი სწორედ 101 წლის გენერალი რადუ თეოდორუ იყო.

თეოდორუს რუმინეთის ახლანდელი ხელისუფლების საწინააღმდეგო განწყობები არასოდეს დაუმალავს — Facebook-ზე გავრცელებულ ინტერვიუში მან დაგმო ჰოლოკოსტი, შეაქო მე-2 მსოფლიო ომში არსებული რუმინეთის ფაშისტური მთავრობა და ახლანდელ ხელისუფლებას "ქვეყნის მძარცველი ანტი-რუმინული რეჟიმი" უწოდა.

პროკურატურის განცხადებით, ჯგუფი გადატრიალების შემდეგ აპირებდა, რუმინეთი NATO-დან და ევროკავშირიდან გამოეყვანა.