დღეს, 6 მარტს, ბათუმის საქალაქო სასამართლოში ნეტგაზეთისა და ბათუმელების უკანონოდ დაკავებული თანადამფუძნებლისა და დირექტორის მზია ამაღლობელის ადმინისტრაციული საქმის განხილვას ლიეტუვის ელჩი დარიუს ვიტკაუსკასი ესწრება.

ამას გარდა, საქმის განხილვას ესწრებიან ნორვეგიის და დიდი ბრიტანეთის საელჩოების წარმომადგენლები. ინფორმაციას ბათუმელები ავრცელებს.

მათი ცნობით, ბათუმის საქალაქო სასამართლოში მოსამართლე სალიხ შაინიძე მზია ამაღლობელის ადმინისტრაციული დაკავების საქმეს განიხილავს. მზია ამაღლობელის ადმინისტრაციული დაკავება გაყალბებული ოქმით მოხდა.

შეგახსენებთ, რომ მზია ამაღლობელის წინასასამართლო სხდომას 4 მარტსაც ესწრებოდნენ: საფრანგეთის ელჩი საქართველოში შერაზ გასრი, საქართველოში გერმანიის ელჩის, პეტერ ფიშერის მოადგილე და ევროპის სხვადასხვა ქვეყნის საელჩოების წარმომადგენლები.

ბათუმის საქალაქო სასამართლოს მოსამართლე ვიქტორ მეტრეველმა 4 მარტს მზია ამაღლობელი პატიმრობაში დატოვა.

ვიქტორ მეტრეველმა დააკმაყოფილა პროკურორების — შოთა ჩხაიძისა და თორნიკე გოგეშვილის მოთხოვნა აღკვეთის ღონისძიების სახით პატიმრობის გამოყენების გადაწყვეტილების ძალაში დატოვების შესახებ.

პროკურორები ამტკიცებდნენ რომ გათავისუფლების შემთხვევაში, მზია ამაღლობელი, შესაძლოა, მიმალულიყო ან სავარაუდო დანაშაული განმეორებით ჩაედინა. დაცვის მხარის პოზიცია იყო, რომ მზია ამაღლობელი დაუყოვნებლივ, დარბაზიდანვე უნდა გათავისუფლებულიყო.

ამავე თემაზე:

ქართულმა მართლმსაჯულებამ დემონსტრაციულად ჩამოართვა უფლება დაიცვას თავი – ამაღლობელის ადვოკატები

სასამართლომ მზია ამაღლობელი პატიმრობაში დატოვა

ნონა ქურდოვანიძის თქმით, ადმინისტრაციულ სამართალდარღვევასთან დაკავშირებით, მზია ამაღლობელის პროცესი ხვალ გაიმართება

მზია ამაღლობელის საქმეს პოლიციელის პატაკი დაერთო, რომლის მიხედვითაც ჟურნალისტი პოლიციელზე თავდასხმას სხვებთან კომუნიკაციით გეგმავდა