კოალიცია "ძლიერი საქართველოს" წევრი სიმონ ჯანაშია სამთავრობო პროპაგანდისტული ტვ იმედის "ქარდს" აქვეყნებს, სადაც წერია: "თბილისის მერიის თანამშრომელი, რადიკალური ოპოზიციის მხარდამჭერი და აქციების აქტიური მონაწილე ანა კომლაძე სამსახურიდან გაათავისუფლეს".

სიმონ ჯანაშიას თქმით, "გადავედით იმ საფეხურზე, როდესაც რეჟიმი რეპრესიების დამალვას აღარ ცდილობს".

"ეს ის მომენტია, როდესაც ღიად ამბობს სისტემა, რომ განსხვავებული აზრის მატარებლები ხალხის მტრები არიან და საზოგადოებისგან უნდა მოიკვეთონ. შემდეგი ეტაპია გულაგების აშენება, რადგან პატიმრების რაოდენობას ციხე ვეღარ ეყოფა.

რასაც ეს სისტემა არ ითვალისწინებს, ის არის რომ განსხვავებით სსრკ-სგან, სადაც ერთი ორი საზოგადოებისგან მარგინალიზებული დისიდენტი იდგა ღიად თავისუფლების მხარეს, ახლა ათასობით ადამიანი გამოხატავს სათქმელს მარშებზე, რუსთაველზე, სოციალურ ქსელებში", — წერს სოციალურ ქსელში სიმონ ჯანაშია.

ცნობისათვის, ანა კომლაძემ 5 მარტს დაწერა სოციალურ ქსელში, რომ 17 მარტიდან ის მერიის თანამშრომელი აღარ იქნება, რადგან მისი და მისი კოლეგის დასჯის მიზნით კულტურის პროექტების და პროგრამების განყოფილება, რომელიც საქმეს ვერ აუდიოდა, 2 შტატამდე დაიყვანეს.

"ძალიან მიამიტი ვიყავი და ბოლო წუთამდე მაინც არ მჯეროდა! საკრებულოს ვებგვერდზე დღეს გამოქვეყნებული დადგენილებიდან ვიგებ, რომ 17 მარტიდან მერიის თანამშრომელი აღარ ვიქნები!

კულტურის პროექტებისა და პროგრამების 4-შტატიანი განყოფილება გადაიქცა 2-შტატიან განყოფილებად!

შეამცირეს უფროსი სპეციალისტის 2 შტატი, დარჩა განყოფილების უფროსი და ერთი უმცროსი სპეციალისტი.

ასეთი პრეცედენტი მერიის ისტორიაში არ ყოფილა! 2-შტატიანი განყოფილება, უფროსი და ერთი ქვეშევრდომი. სასაცილოა, სატირალი რომ არ იყოს.

კულტურის პროექტების და პროგრამების განყოფილება, რომელიც საქმეს ვერ აუდიოდა, 2 შტატამდე დაიყვანეს, ჩემი და ჩემი კოლეგის დასჯის მიზნით" — დაწერა მოქალაქე ანა კომლაძემ სოციალურ ქსელში.