5 მარტს "კრაბ კოფის" დამფუძნებლებს თავს დაესხნენ. ქრისტი პირველი სოციალურ ქსელში წერს, რომ მას წინა კბილის ღრძილის მოტეხილობა აქვს, მეორე გოგონას კი ცხვირი აქვს მოტეხილი და ოპერაციას საჭიროებს.

"მეგობრებო ძალიან დიდი მადლობა ყურადღებისთვის და თანადგომისთვის ყველას გეფერებით და გვიყვარხართ. ჩვენ არაფრის გვეშინია, სახლში ვართ უკვე, ველოდებით გამოძიებას, სამწუხაროდ დეტალებზე საუბარი არ შემიძლია სანამ გამოძიება მიმდინარეობს.

დაზიანებებს რაც შეეხება, წინა კბილის ღრძილის მოტეხილობა მაქვს მე და იმპლანტი მჭირდება, ბარბის ცხვირი აქვს მოტეხილი და ხვალ დილით ჩაუტარდება ოპერაცია", — დაწერა ქრისტი პირველმა facebook-ზე რამდენიმე საათის წინ.

ცნობისთვის, "კრაბ კოფი" რუსთაველზე მიმდინარე აქციის მონაწილეებს დღემდე უსასყიდლოდ უმასპინძლდებოდა ჩაით, ყავითა და წყლით. ამ დროისთვის დამატებითი დეტალები უცნობია.

თავდასხმიდან რამდენიმე საათში ინფორმაცია გაავრცელა შსს-მ. მათი ცნობით, "კრაბ კოფის" თანამშრომლებს კონფლიქტი მოუვიდათ მაღაზიაში მყოფ პირთან, რაც მაღაზიის გარეთ სიტყვიერ და ფიზიკურ დაპირისპირებაში გადაიზარდა, ფაქტზე გამოძიება 126-ე მუხლით დაიწყო, რაც ძალადობას გულისხმობს.

"თბილისში, ერთ-ერთ უბანში, "კრაბ კოფის" თანამშრომლებს კონფლიქტი მოუვიდათ მაღაზიაში მყოფ პირთან, რაც შემდგომში მაღაზიის გარეთ სიტყვიერ და ფიზიკურ დაპირისპირებაში გადაიზარდა. სამართალდამცველებმა მომხდარ ფაქტზე გამოძიება სისხლის სამართლის კოდექსის 126-ე მუხლით დაიწყეს, რაც ძალადობას გულისხმობს," — ნათქვამია შსს-ს მიერ გავრცელებულ ინფორმაციაში.