რუსთაველის გამზირზე გამართულ საპროტესტო აქციებზე დაკავებული 11 პირი — ანდრო ჭიჭინაძე, ონისე ცხადაძე, გურამ მირცხულავა, ლუკა ჯაბუა, ჯანო არჩაია, რუსლან სივაკოვი, ვალერი თეთრაშვილი, გიორგი ტერიშვილი, ირაკლი ქერაშვილი, რევაზ კიკნაძე და სერგეი კუხარჩუკი — მოსამართლემ პატიმრობაში დატოვა.

მოსამართლე ირაკლი შვანგირაძემ დააკმაყოფილა პროკურატურის მოთხოვნა აღკვეთის ღონისძიების სახით პატიმრობის გამოყენების ძალაში დატოვების შესახებ, რასაც პროკურორი "მიმალვისა და ახალი დანაშაულის ჩადენის" რისკით ხსნიდა.

11-ვე დაკავებულს ბრალი საქართველოს სისხლის სამართლის კოდექსის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს. მუხლი სასჯელის სახით 4-დან 6 წლამდე პატიმრობას ითვალისწინებს. წარდგენილ ბრალდებას დაკავებული 11 მოქალაქიდან არცერთი არ აღიარებს.

სასამართლოს მშვიდად არ ჩაუვლია — დაკავებულების დარბაზში მყოფი ახლობლები ბრალდებულების მიერ წარმოთქმულ სიტყვებს ოვაციით ხვდებოდნენ, რის გამოც ირაკლი შვანგირაძემ სხდომა დახურა და დამსწრეები დარბაზიდან ძალის გამოყენებით გააძევეს.