საქართველოს ახალგაზრდა იურისტთა ასოციაციის (საია) თავმჯდომარე, ნონა ქურდოვანიძე Facebook პოსტში წერს, რომ ნეტგაზეთისა და ბათუმელების უკანონოდ დაკავებული დამფუძნებლის, მზია ამაღლობელის, იმ საქმესთან დაკავშირებული პროცესი, რომელშიც მას ადმინისტრაციულ სამართალდარღვევას ედავებიან, 6 მარტს, 15:00 საათზე ჩაინიშნა.

ნონა ქურდოვანიძე წერს, რომ საქმე დაფუძნებულია გაყალბებულ ოქმებზე. მისივე თქმით, როგორც ადმინისტრაციული დაკავების, ასევე სამართალდარღვევის ოქმებში ტყუილები წერია.

"გუშინ მზია ამაღლობელი უკანონო პატიმრობაში დატოვეს. მოსამართლემ დაცვის მხარის მოწმედ დასაკითხ პირთა ნუსხიდან ამოიღო 17 პირი, 18 ვიდეო მტკიცებულება, 13 დათვალიერების ოქმი და 14 წერილობითი მტკიცებულება.

აღნიშნული ქმედებით სასამართლომ მზია ამაღლობელი დატოვა დაცვის უფლების განხორციელების გარეშე და პროცედურულადაც კი არ უზრუნველყო მისი უფლება სამართლიან სასამართლოზე.

მზიას ასევე ედავებიან, რომ ადმინისტრაციული სამართალდარღვევა ჩაიდინა, ეს საქმე ხვალ, 15:00 საათზე განიხილება. საქმე დაფუძნებულია გაყალბებულ ოქმებზე — როგორც ადმინისტრაციული დაკავების, ასევე - სამართალდარღვევის ოქმებში წერია ტყუილები. დაკავების ოქმი გასაჩივრებულიც გვაქვს შსს-ში და გუშინ მივიღეთ პასუხი, რომლითაც დგინდება, რომ ჩვენი საჩივარი თურმე ისევ იმას დააწერეს, ვის წინააღმდეგაც ვდაობთ", — წერს ნონა ქურდოვანიძე.