ველი უკვე მესამე წელია, მარტის თვეში პლატფორმას ქართველი ქალი მეწარმეების მხარდაჭერასა და მათი პროდუქტების პოპულარიზაციას უთმობს. ყოველწლიურად ქართველი მეწარმე ქალების ბრენდების რაოდენობა ველის ციფრულ თაროებზე იზრდება. ამჟამად პლატფორმაზე 150-ზე მეტი ქართველი ქალი მეწარმის ბრენდს სხვადასხვა კატეგორიაში შეხვდებით — მათ შორის აქსესუარებს, სამკაულებს, ტექსტილს, ღვინოს და სხვა.

“წინა წლების შედეგმა კიდევ უფრო თვალსაჩინოდ დაგვანახა საჭიროება და მნიშვნელობა, რომ მარტის თვის კამპანია ყოველწლიურად მეწარმე ქალების მხარდაჭერასა და მათი ბრენდების ცნობადობის ამაღლებას დავუთმოთ. გასულ წელს ჩატარებულმა აქტივობებმა, ფაქტობრივად გააორმაგა მათი ბრენდების გაყიდვები და ასევე გაჩნდა ძალიან დიდი სურვილი და ინიციატივა, სხვა ქართველი მეწარმე ქალებისგან, განეთავსებინათ მათი პროდუქცია ველიზე.” — თათია კარიაული, ველის ბრენდის ხელმძღვანელი.

წელს VELI.store-ისა და გაეროს ქალთა ორგანიზაციის თანამშრომლობის ფარგლებში ველიმ ახალი ქართველი ქალი მეწარმეების აღმოჩენა და მათი პროდუქტების ველიზე განთავსება შეძლო, რამაც მეწარმეებს გაყიდვების მთავარი ან ალტერნატიული, სრულყოფილი პლატფორმა შესთავაზა.

“მეწარმე ქალებისთვის გამოწვევები კომპლექსურია და მათთან გამკლავება ასევე კომპლექსურ მუშაობას მოითხოვს. თუმცა, ამჟამად არსებული გლობალური თუ ადგილობრივი სირთულეებიდან გამომდინარე, განსაკუთრებით მნიშვნელოვანია გაყიდვების ალტერნატიული სივრცეების ათვისება, სხვადასხვა ბაზარზე წვდომა და ბიზნესკავშირების გაძლიერება.

შესაბამისად მათი მხარდაჭერის მნიშვნელოვანი ნაწილი გაყიდვებსა და საჭირო კონტაქტების დამყარებაში, ახალი ბაზრებისა და სივრცეების ათვისებაში ხელშეწყობა, რეალიზაციის დისტანციური არხების განვითარებასა და ელექტრონული კომერციის პლატფორმებზე განთავსებაში დახმარებაა, რათა მათი პროდუქტების პოპულარიზაცია და მომგებიანობა გაიზარდოს.” — ქეთი შუბაშვილი, გაეროს ქალთა ორგანიზაციის პროგრამის მენეჯერი, ქალთა ეკონომიკური გაძლიერება.

გაეროს ქალთა ორგანიზაციის საქმიანობის ერთ-ერთი მთავარი მიმართულება ქალთა ეკონომიკური გაძლიერებაა. ამ მიმართულების მნიშვნელოვანი ნაწილი მოიაზრებს, ხელი შეუწყოს ქალებს, განსაკუთრებით საქართველოს რეგიონებში, მეწარმეობის დაწყებაში და მხარი დაუჭიროს მათ უკვე არსებული საქმიანობების გაფართოებასა და განვითარებაში.

ამ მიზნით, მთელი ქვეყნის მასშტაბით, გაეროს ქალთა ორგანიზაცია დამწყებ თუ გამოცდილ მეწარმე ქალებს პიროვნული, პროფესიული და სამეწარმეო უნარებისა და ცოდნის გაძლიერებაში ეხმარება. ეს დახმარება ტრენინგების ორგანიზებას, მენტორინგის შეთავაზებას, საინფორმაციო შეხვედრებს, სასარგებლო ბიზნესკავშირების დამყარებას, ფინანსებსა და ბაზრებზე ხელმისაწვდომობის ხელშეწყობასა და სხვა აქტივობებს მოიაზრებს.

აღმოაჩინე ქართველი მეწარმე ქალები ველიზე და დაუჭირე მხარი, მათი პროდუქტების შერჩევით.