ნახევარგამტარების მწარმოებელი თაივანური კომპანია TSMC აშშ-ში 100-მილიარდიანი ინვესტიციის განხორციელებას გეგმავს, რის შედეგადაც შტატებში ჩიპების მწარმოებელი დამატებით 5 ქარხანა აშენდება.

თაივანის დომინანტური პოზიცია ისეთი ჩიპების წარმოებაში, რომელთაც ტელეფონებში, ავტომობილებში, სამხედრო თვითმფრინავებსა და სხვა ტექნოლოგიებში იყენებენ, შეშფოთებას იწვევს აშშ-ში კუნძულზე გადაჭარბებული დამოკიდებულების კუთხით — განსაკუთრებით ჩინეთის მხრიდან მზარდი ზეწოლის ფონზე. ჩინეთის სახალხო რესპუბლიკა თაივანს თავის ტერიტორიად მიიჩნევს.

TSMC-მ, რომელიც ჩიპების წარმოებაში მსოფლიოს ლიდერია, გეგმა 3 მარტს წარადგინა, როცა კომპანიის აღმასრულებელი დირექტორი სი სი ვეი აშშ-ის პრეზიდენტ დონალდ ტრამპს თეთრ სახლში შეხვდა.

"ჩვენ უნდა შევძლოთ, რომ ვაწარმოოთ ჩიპები და ნახევარგამტარები, რომლებიც აქ გვჭირდება — ეს ჩვენთვის ეროვნული უსაფრთხოების საკითხია", — განაცხადა დონალდ ტრამპმა.