ბათუმელების რედაქტორმა, ეთერ თურაძე, ბათუმის საქალაქო სასამართლოსთან მზია ამაღლობელის სასამართლო პროცესის დაწყებამდე განაცხადა, რომ გონივრული იქნება ხელისუფლების მხრიდან მზია ამაღლობელის გათავისუფლება, რადგან 30 წელზე მეტია რაც საქართველოს ქალი სინდისის პატიმარი არ ჰყოლია და ამ გადაწყვეტილებით ოცნების ხელისუფლება ამ "დამღას" აიცილებენ.

თურაძემ ასევე დასძინა, რომ ჟურნალისტისთვის წარდგენილი მუხლი აბსურდულია და დროა, გადახედონ გადაწყვეტილებების მიმღებმა ადამიანებმა, თავის გადაწყვეტილებას.

"სიმართლე გითხრათ, დიდი მოლოდინი არ მაქვს. ვფიქრობ, რომ გონივრული იქნება, თუ გაათავისუფლებენ. ეს ყველასთვის მომგებიანი იქნება იმ თვალსაზრისით, რომ ქალი სინდისის პატიმარი ქვეყანას აღარ ეყოლება და ამ ხელისუფლებას, ეს დამღა არ დარჩება.

30 წელზე მეტია, რაც საქართველომ დამოუკიდებლობა მოიპოვა, მას შემდეგ ამ ქვეყანას არასოდეს ქალი სინდისის პატიმარი არ ჰყოლია და ეს არის ამ თვალსაზრისით ერთგვარი დამღა. ვფიქრობ, რომ დროა გადახედონ გადაწყვეტილებების მიმღებმა ადამიანებმა, თავის გადაწყვეტილებას. მზია ამაღლობელის გათავისუფლებით, მათ არავითარი პრობლემა არ შეექმნებათ, პირიქით, ეს მათთვის პოზიტიური ამბავი იქნება, იმ თვალსაზრისით, რომ ჰუმანურობის პრინციპებით იხელმძღვანელეს," — განაცხადა თურაძემ.

შეგახსენებთ, 4 მარტს გამოცემა ბათუმელებისა და ნეტგაზეთის დამფუძნებლის, მზია ამაღლობელის სასამართლო პროცესი, ბათუმის საქალაქო სასამართლოში გაიმართება.

წინასასამართლო სხდომაზე მოსამართლე ვიქტორ მეტრეველმა უნდა გადაწყვიტოს მხარეების მიერ წარმოდგენილი მტკიცებულებების დასაშვებობის საკითხი. პროცესზე გადაწყდება საქმე გადაეცემა თუ არა სასამართლოს არსებითად განსახილველად. სასამართლო აღკვეთის ღონისძიების გადასინჯვის თაობაზეც იმსჯელებს.

მზია ამაღლობელს სისხლის სამართლის კოდექსის 353-ე მუხლით ედავებიან, რაც პოლიციელზე თავდასხმას გულისხმობს, რომელიც თავისუფლების აღკვეთას 4-დან 7 წლამდე ითვალისწინებს.