ტრამპმა უკრაინის სამხედრო დახმარება, ზელენსკისთან ოვალურ კაბინეტში კამათის შემდეგ, დააპაუზა, ინფორმაციას CNN-ს თეთრი სახლის ოფიციალურ პირზე დაყრდნობით ავრცელებს.

ოფიციალური პირები და ანალიტიკოსები აცხადებენ, რომ დახმარების შეჩერებამ, რომელიც მას შემდეგ მოხდა, რაც ტრამპმა თეთრ სახლში ეროვნული უსაფრთხოების მაღალჩინოსნებთან შეხვედრების სერია გამართა, შეიძლება მძიმე გავლენა იქონიოს უკრაინის ომზე.

CNN ერთ-ერთ ოფიციალურ პირზე დაყრდნობით წერს, რომ სამხედრო დახმარების შეჩერება ძალაში დარჩება მანამ, სანამ ტრამპი არ დარწმუნდება, რომ ზელენსკიმ სამშვიდობო მოლაპარაკებებზე პასუხისმგებლობა აიღო.

"პრეზიდენტმა ნათლად განაცხადა, რომ ის ორიენტირებულია მშვიდობაზე. ჩვენ გვჭირდება ჩვენი პარტნიორებიც ამ მიზნის ერთგული იყვნენ. ჩვენ ვაჩერებთ დახმარებას და გადავხედავთ ამ დახმარებას, რათა დავრწმუნდეთ, რომ მას შეუძლია ხელი შეუწყოს სამშვიდობო შეთანხმების დადებას", — თქვა თეთრი სახლის ოფიციალურმა წარმომადგენელმა.

CNN წერს, რომ ბოლო კვირებში ტრამპმა რუსეთის პრეზიდენტის ვლადიმერ პუტინის თეზისებს იმეორებს და ტყუის, რომ უკრაინამ დაიწყო ომი და ზელენსკის დიქტატორობაში სდებს ბრალს. მისი გადაწყვეტილება სამხედრო დახმარების მიწოდების შეჩერების შესახებ არის ნაბიჯი, რომელსაც შეიძლება ჰქონდეს რეალური შედეგები კონფლიქტის ბალანსზე და გააძლიეროს პუტინის პოზიციები.

ოფიციალური პირების თქმით, პაუზა ეხება ყველა სამხედრო აღჭურვილობას, რომელიც ჯერ კიდევ არ არის უკრაინის ტერიტორიაზე და წარმოადგენს ტრამპის პირდაპირ პასუხს "ზელენსკის ცუდ ქცევაზე".

CNN-ის ინფორმაციით, უკრაინამ შესაძლოა შეინარჩუნოს ბრძოლის მიმდინარე ტემპი რამდენიმე კვირის განმავლობაში — შესაძლოა ზაფხულის დასაწყისამდე. სტატიაში ვკითხულობთ, რომ სწორედ ბაიდენის პრეზიდენტობის დროს გაგზავნილმა იარაღმა, მათ შორის შორ დისტანციაზე მოქმედმა ATACMS-ის რაკეტებმა — მისცა საშუალება უკრაინას, დაერტყა რუსეთის ტერიტორიის სიღრმეში.