"სიმართლე ვერ აიკრძალება" — ქუთაისში საპროტესტო აქცია იმართება

ქუთაისში რიონის ხეობის მცველების ორგანიზებული აქცია — "სიმართლე ვერ აიკრძალება" — იმართება. აქციას ბალდისა და ზოდის მცველებიც უერთდებიან.

აქციის ორგანიზატორები აცხადებენ, რომ აპროტესტებენ სირტვის თავისუფლების შეზღუდვას ქვეყანაში, რაც უზღუდავს სამოქალაქო საზოგადოებას შესაძლებლობას, ჩაერთონ მნიშვნელოვანი საკითხების ერთობლივ გადაწყვეტაში, გამოხატონ აზრი თავისუფლად და იბრძოლონ უსმართლობის წინააღმდეგ.

"ბოლო ოთხი წლის განმავლობაში, ჩვენ, თქვენთან ერთად, შევძელით ნამოხვანში, რაჭაში, ლეჩხუმში მნიშვნელოვანი გამარჯვებების მიღწევა. მიუხედავად არაერთი წინააღმდეგობისა, პროტესტის მშვიდობიანმა, კანონმორჩილმა ხასიათმა და ჩვენმა ერთობამ განაპირობა სახალხო პროტესტების სამი წარმატებული შედეგი, თუმცა ბოლო დროს კანონმდებლობა სიტყვისა და გამოხატვის თავისუფლების კუთხით იმდენად დამძიმდა, რომ პროტესტის ფორმები, რასაც ჩვენ აქამდე მივმართავდით, სისხლის სამართლით დასჯად დანაშაულად იქცა. ამ საკანონმდებლო ცვლილებებით გამართლდა და დაკანონდა მძიმე რეპრესიები, რაც თითქმის ორი წლის წინ დაიწყო, ბოლო თვეების განმავლობაში კი განსაკუთრებულ მასშტაბს მიაღწია.

ასეთ ვითარებაში შეუძლებელი ხდება პროტესტის გამოხატვის შესაძლებლობა, აღარ რჩება მნიშვნელოვან საკითხებში ჩვენი საერთო, სახალხო მონაწილეობის თეორიული შესაძლებლობაც კი. საქართველოს სხვადასხვა კუთხეში ადამიანები ახლაც იბრძვიან თავიანთი სოფლის, მიწა-წყლის დასაცავად, არაერთი უსამართლობის წინააღმდეგ. ვიცით, დღეს თუ ხვალ ჩვენც მოგვიწევს დავიცვათ, რისთვისაც ვიბრძოდით, დაკანონებული რეპრესია კი ყველას ერთად გვემუქრება.

ჩვენ არაერთხელ დავაფიქსირეთ ჩვენი პოზიცია მიმდინარე მოვლენებზე, თუმცა ვფიქრობთ, დროა ყველა ერთად შევიკრიბოთ; ვფიქრობთ, აუცილებელია საჯაროდ ვთქვათ ჩვენი სათქმელი!", — აცხადებენ საპროტესტო აქციის ორგანიზატორები.