საინფორმაციო სააგენტო Reuters-ის ცნობით, უკრაინის ტერიტორიული მთლიანობის მხარდამჭერი, რუსული აგრესიის დამგმობი გაეროს რეზოლუციის თანასპონსორი აშშ არ იქნება. ამის შესახებ Reuters სამ სხვადასხვა დიპლომატიურ წყაროზე დაყრდნობით წერს.

ნაბიჯი, როგორც ჩანს, ასახავს იმ უფსკრულის გაფართოებას, რომელი უკრაინის პრეზიდენტ ვოლოდიმირ ზელენსკისა და აშშ-ის პრეზიდენტ დონალდ ტრამპს შორის გაჩნდა, რომელიც ომის დაჩქარებული წესით დასრულებას ცდილობს და რომლის გუნდიც რუსეთთან მოლაპარაკებებს უკრაინის ჩართვის გარეშე აწარმოებს.

ეს უკრაინისთვის მნიშვნელოვანი პოლიტიკური კრიზისის მაჩვენებელია — ქვეყანამ აშშ-ის წინა ადმინისტრაციისგან ათობით მილიარდი დოლარის სამხედრო დახმარება მიიღო და, გარდა ამისა, აშშ ომში მყოფ ქვეყანას დიპლომატიურ ასპარეზზეც ეხმარებოდა.

Reuters იუწყება, რომ რეზოლუციის პროექტი გმობს რუსეთის აგრესიას და ადასტურებს ერთგულებას უკრაინის სუვერენიტეტის, დამოუკიდებლობის, ერთიანობისა და ტერიტორიული მთლიანობის მიმართ მის საერთაშორისოდ აღიარებულ საზღვრებში.

"წინა წლებში, შეერთებული შტატები მუდმივად თანასპონსორობდა მსგავს რეზოლუციებს, რათა მხარი დაეჭირა უკრაინაში სამართლიანი მშვიდობისთვის" — აცხადებს ერთ-ერთი წყარო.

პირველი დიპლომატიური წყაროს ცნობით, რეზოლუციის თანასპონსორი 50 ქვეყანაზე მეტი იქნება. წარსულში აშშ უკრაინის მხარდამჭერი რეზოლუციების აბსოლუტური უმრავლესობის თანასპონსორი იყო.

ამ მომენტისთვის რუსეთს უკრაინის 20% აქვს ოკუპირებული და გაფართოებას აგრძელებს.

Reuters წერს, რომ ამ ეტაპზე უცნობია, თუ როდის არის რეზოლუციის პროექტის თანასპონსორობის ბოლო ვადა და შესაძლოა, რომ აშშ-მ გადაწყვეტილება შეცვალოს.

ასევე იხილეთ: ტრამპმა ზელენსკი დიქტატორად მოიხსენია და არჩევნების დანიშვნისკენ მოუწოდა