"კვერცხების სროლა, რა თქმა უნდა, არ არის ლამაზი და ჩემთვის მიუღებელია ასეთი ქმედებები. არსებობს კანონი, რომელიც კიდევ უფრო მკაცრდება და ღალატისთვის ყველა დამნაშავეს მოუწევს პასუხისგება", — ქალაქის მერი კახა კალაძე საქართველოს მე-5 პრეზიდენტ სალომე ზურაბიშვილსა და გიორგი გახარიაზე აეროპორტში თავდასხმებს ეხმაურება.

მისი თქმით, ეს ადამიანები პირდაპირ ახალისებენ ძალადობას და არ ახსოვთ არც ერთი ფაქტი, რომ ოცნების წარმომადგენლებზე თავდასხმა დაეგმოთ.

"ზოგადად, კვერცხების სროლა, ნებისმიერი შეურაცხყოფა, ჩემთვის მათგან განსხვავებით, მიუღებელია. იმიტომ, რომ ეს ადამიანები პირდაპირ ახალისებენ ძალადობას. არ მახსოვს არცერთი მათგანისგან, მომესმინოს [განცხადება], თუნდაც ჟურნალისტების მიმართ როდესაც მიდის ძალადობა, შეურაცხყოფა. ადამიანმა, რომელმაც "მოლოტოვის კოქტეილი" ესროლა პოლიციელებს და ადამიანებს ცოცხლად წვავდა, ეს ქალბატონი იყო ზუსტად, რომელიც იწყალებდა, ასეთ ადამიანს. მთელი პიარ-კამპანია მიმდინარეობდა, როგორმე გმირად შეერაცხათ, წარმოგიდგენიათ რასთან გვქონდა საქმე?

არ მახსოვს მათი მხრიდან არცერთი განცხადება დაეგმოთ ძალადობა, არცერთი განცხადება დაეგმოთ პოლიტიკოსების მიმართ შეურაცხყოფა, დევნა. მაგალითად, მამუკა მდინარაძის წინააღმდეგ, როდესაც ელისაშვილი ლაჩრულად მიეპარა და უკნიდან ჩაარტყა, არ მახსოვს არცერთი განცხადება.

კიდევ ერთხელ ვამბობ, რა თქმა უნდა, არ არის ლამაზი და ჩემთვის მიუღებელია ასეთი ქმედებები. არსებობს კანონი, რომელიც კიდევ უფრო მკაცრდება და ღალატისთვის ყველა დამნაშავეს მოუწევს პასუხისგება. ჩვენ კონკრეტული ფაქტები გვაქვს იმასთან დაკავშირებით, როგორ ჩადიოდნენ დანაშაულს და ღალატს ქვეყნის წინააღმდეგ", — განაცხადა კალაძემ.

18 თებერვალს, მიუნხენის უსაფრთხოების კონფერენციიდან დაბრუნებულ საქართველოს მე-5 პრეზიდენტს, სალომე ზურაბიშვილს, თბილისის საერთაშორისო აეროპორტში კვერცხები ესროლეს. 17 თებერვალს, ასევე, კვერცხების სროლით დახვდნენ აეროპორტში მიუნხენიდან მომავალ ყოფილ პრემიერმინისტრ გიორგი გახარიას.