დღეს, მიუნხენის უსაფრთხოების 61-ე კონფერენცია (MSC) იხსნება და 14-დან 16 თებერვლამდე, მიუნხენში, სასტუმრო Bayerischer Hof-ში ჩატარდება. მას საქართველოდან საქართველოს მე-5 პრეზიდენტი სალომე ზურაბიშვილი ესწრება. მიუნხენში იმყოფება ასევე საქართველოს ყოფილი შსს და პრემიერმინისტრი გიორგი გახარია.

MSC-ის ვებგვერდზე გავრცელებული ინფორმაციით, MSC 2025 იქნება პლატფორმას მაღალი დონის დებატებისთვის ჩვენი დროის ძირითად საგარეო და უსაფრთხოების პოლიტიკის გამოწვევებზე. 14 თებერვალს კონფერენციას გერმანიის ფედერალური პრეზიდენტი ფრანკ-ვალტერ შტაინმაიერი გახსნის. ასობით ლიდერი მსოფლიოს სხვადასხვა რეგიონიდან განიხილავს მსოფლიოს უსაფრთხოების პოლიტიკის გამოწვევებს კრისტოფ ჰეუსგენის თავმჯდომარეობით.

MSC 2025 ცვლილებების გადამწყვეტ მომენტში ტარდება: იანვარში აშშ-ის ახალი ადმინისტრაცია იკავებს სამსახურს, ამას გარდა, მას ბრიუსელში ევროპული საკანონმდებლო ორგანოს ახალი ციკლი და ერთ კვირაში გერმანიის საპარლამენტო არჩევნები მოჰყვება.

პარასკევს, კონფერენციის მთავარი პროგრამა დაიწყება გლობალური უსაფრთხოების გამოწვევებზე, მათ შორის გლობალურ მმართველობაზე, დემოკრატიულ მდგრადობაზე, კლიმატის უსაფრთხოებაზე და ბევრ სხვა თემაზე მსჯელობით. შაბათს გაიმართება დებატები საერთაშორისო წესრიგის მდგომარეობაზე, ასევე რეგიონულ კონფლიქტებსა და კრიზისებზე. კვირას კონფერენცია დასრულდება დისკუსიებით ევროპის როლზე მსოფლიოში.

MSC 2025 კვლავ იქნება იდეების ბაზარი და შექმნის სივრცეს რაც შეიძლება მეტი შესაბამისი და თანმიმდევრული დებატებისთვის. როგორც წინა წლებში, კონფერენციის პროგრამა შედგება სამი ნაწილისგან: მთავარი პროგრამა, რომელსაც კურირებს MSC, 200-მდე ოფიციალური გვერდითი ღონისძიება და ათობით ღონისძიება საზოგადოებისთვის. კონფერენციის დაწყებამდე ერთი დღით ადრე, გერმანიის ფინანსთა მინისტრი, იორგ კუკიესი, ტერორიზმის დაფინანსების შესახებ მე-4 მინისტრთა კონფერენციაზე მინისტრებსა და საერთაშორისო ინსტიტუტების მაღალ წარმომადგენლებს უმასპინძლებს.

კონფერენციის ბოლოს იენს სტოლტენბერგი კრისტოფ ჰეუსგენს MSC-ის ახალ თავმჯდომარის პოსტზე ჩაანაცვლებს, წერია MSC-ის ვებგვერდზე.

MSC უნდა დაესწრონ აშშ-ს სახელმწიფო მდივანი მარკო რუბიო და ვიცე-პრეზიდენტ ჯ.დ. ვენსი. მედიაში გავრცელებული ცნობით, საჰაერო ძალების თვითმფრინავი, რომელშიც აშშ-ს სახელმწიფო მდივანი მარკო რუბიო და სენატის საგარეო ურთიერთობათა კომიტეტის თავმჯდომარე ჯიმ რიში იმყოფებოდნენ, ტექნიკური პრობლემის გამო ვაშინგტონში დაბრუნდა.

აშშ-ს სახელმწიფო დეპარტამენტის სპიკერმა, ტემი ბრიუსმა დაადასტურა ინციდენტი და თქვა, რომ რუბიოს გააგრძელებ მოგზაურობას გერმანიასა და ახლო აღმოსავლეთში სხვა თვითმფრინავით.

შეგახსენებთ, რომ აშშ-ს სახელმწიფო მდივან რუბიოსა და ვიცე-პრეზიდენტ ჯ.დ. ვენსს შეხვედრა აქვთ დაგეგმილ უკრაინის პრეზიდენტ ვლადიმირ ზელენსკისთან.