12 თებერვალს, ბათუმელებისა და ნეტგაზეთის დამფუძნებლის, მზია ამაღლობელის, ადვოკატებმა მზია ამაღლობელის მიმართ აღკვეთის ღონისძიების სახით გამოყენებული პატიმრობის გაუქმების მოთხოვნით შუამდგომლობა წარადგინეს.

გარდა ამისა, მზია ამაღლობელის ადვოკატები 7 მთავარ მოთხოვნას აყენებენ:

1. სასამართლომ დაუშვას დაცვის მხარის შუამდგომლობა, გააუქმოს მზია ამაღლობელის მიმართ შერჩეული აღკვეთის ღონისძიება და გაათავისუფლოს მზია ამაღლობელი უკანონო პატიმრობიდან;
2. საქართველოს პროკურატურამ დაუყოვნებლივ შეწყვიტოს მზია ამაღლობელის უკანონო ბრალდების საქმე;
3. სპეციალურმა საგამოძიებო სამსახურმა შეასრულოს მასზე დაკისრებული ვალდებულება და სათანადოდ გამოიძიოს მზია ამაღლობელის მიმართ ჩადენილი არასათანადო მოპყრობის ფაქტი;
4. პროკურატურამ მიანიჭოს მზია ამაღლობელს დაზარალებულის სტატუსი;
5. საქართველოს პროკურატურამ დაიწყოს სისხლის სამართლებრივი დევნა გრიგოლ ბესელიას და მისდამი დაქვემდებარებული პოლიციის შესაბამისი მოხელეების მიმართ მზია ამაღლობელის უკანონო დაკავების და უკანონო ადმინისტრაციული სამართალწარმოების გამო.
6. საქართველოს პროკურატურამ დაიწყოს სისხლის სამართლებრივი დევნა ირაკლი დგებუაძის მიმართ 2025 წლის 12 იანვარს დაკავებული მზია ამაღლობელის მიმართ ჩადენილი არასათანადო მოპყრობისა და 2025 წლის 11 იანვრის ბათუმის აქციაზე ციალა ქათამაძის უკანონო დაკავების გამო;
7. საქართველოს პროკურატურამ დაიწყოს დევნა შინაგან საქმეთა სამინისტროს ყველა იმ მოხელის წინააღმდეგ, ვინც მიიღო მონაწილეობა 2025 წლის 11-12 იანვრის ბათუმის საპროტესტო აქციის მონაწილეთა უკანონო ადმინისტრაციულ დაკავებასა და უკანონო ადმინისტრაციულ სამართალწარმოებაში.

ბრიფინგზე ადვოკატებმა ისაუბრეს და აჩვენეს ვიდეო-აუდიო სამხილები, სადაც ცხადად ჩანს, რომ დაკავებისას მზია ამაღლობელი სიტყვიერ შეურაცხყოფას არ აყენებს პოლიციელებს და ბათუმის პოლიციის უფროსი ირაკლი დგებუაძე ცხადად ამბობს, რომ ჟურნალისტი "სისხლის სამართლით უნდა დაიჭირონ".

"ყველა ის პოლიციელი, რომელიც გამოჰკითხეს ჰყვებიან, რომ თითქოს მათ შესთავაზეს წყალი და არანაირი არასათანადო მოპყრობა მზიას მიმართ არ ყოფილა. ჩვენ, პირველ რიგში ირაკლი დგებუაძის დაკითხვაზე ყოფნას, მზიას ჩვენებით ვადასტურებთ. სავარაუდოდ ვიდეოში ჩვენ გვესმის, ირაკლი დგებუაძის ხმა, რომელიც ამბობს რომ სისხლით უნდა დავიჭიროთ ეს ადამიანი [მზია] და იგინება. ასევე ამ ყველაფერს ნათელს მოფენს ის კამერები და ის ჩანაწერები, რომელიც აქ შენობაში შსს-ს, მაგრამ ამ დრომდე გამოძიებას არ გადასცეს ეს კადრები. შეიძლება დაკითხვის ოთახში არ იყო კამერები, მაგრამ დერეფანში დამონტაჟებულ კამერებში ჩანს, როგორ ცდილობს დგებუაძე შევიდეს მზიასთან დაკითხვის ოთახში. ეს იქნებოდა მნიშვნელოვანი ნივთმტკიცებულება ჩვენთვის.ეს რა თქმა უნდა გამოძიების არაეფექტურ მუშაობაზე მიანიშნებს," — განაცხადა ადვოკატმა.

ადვოკატი მაია მწარიაშვილი კითხვას სვამს: თუ დგებუაძე ჩვენებაში ამბობს, რომ ის საერთოდ არ შესულა შენობაში და მიტინგზე გააგრძელა ყოფნა, როგორ ადასტურებს 6 პოლიციელი, რომ დგებუაძეს ლოყა ჰქონდა დაწითლებული.

ამას გარდა, ამაღლობელის ადვოკატების თქმით, მზია ამაღლობელის საქმეს რამდენიმე პოლიციელის ჩვენება დაემატა რომლებიც უდასტურებენ, რომ ირაკლი დგებუაძეს სილის გაწვნის შემდეგ ყური და ლოყა გაუწითლდა.