ექსპერტიზის დასკვნით, კესარია აბრამიძე დანით მიყენებული 28 ჭრილობის შედეგად გარდაიცვალა. ამის შესახებ დღეს, ბექა ჯაიანის სასამართლო პროცესზე ითქვა.

ბექა ჯაიანს კესარია აბრამიძის მკვლელობა ედება ბრალად. დღევანდელი სასამართლო, მტკიცებულებების გამოკვლევაზე გადავიდა და ბრალდებულის მხარემ სამედიცინო ექსპერტიზის დასკვნა წარადგინა.

პროკურორ გრიგოლ ნიშნიანიძის განცხადებით, სისხლნაკლებობამ და ამ ჭრილობებმა გამოიწვია კესარია აბრამიძის გარდაცვალება.

დაცვის მხარემ წარდგენილი მტკიცებულებები სადავოდ მიიჩნია, რის გამოც ექსპერტიზის გამცემი — ქეთევან ბედინაშვილი, შემდეგ სასამართლო სხდომაზე დაიკითხება. ბრალდების მხარე მის წინააღმდეგ წარდგენილ მტკიცებულებებს ნაწილობრივ აღიარებს და უდავოდ მიიჩნევს.

"დღევანდელ სასამართლო სხდომაზე ბრალდების მხარემ, ბექა ჯაიანის სისხლის სამართლის საქმეზე დამატებით წარადგინა სამედიცინო ექსპერტიზის დასკვნა კესარია აბრამიძის გარდაცვალების მიზეზის თაობაზე. [აბრამიძის] გარდაცვალების მიზეზი არის ჯაიანის მიერ 28 ჭრილობის მიყენება, დანის გამოყენებით. ყველა ჭრილობა სიცოცხლის დროინდელია და სისხლნაკლებობამ და მიყენებულმა ჭრილობებმა კესარია აბრამიძის გარდაცვალება გამოიწვია.

წარმოდგენილი მტკიცებულება დაცვის მხარემ სადავოდ მიიჩნია. რაც ნიშნავს იმას, რომ მოცემული სისხლის სამართლის საქმეზე აღნიშნული ექსპერტიზის დასკვნის გამცემი ექსპერტი დაიკითხებიან. რაც შეეხება სხვა მტკიცებულებებს, რაც გამოძიების ეტაპზე იყო მოპოვებული და წარმოდგენილი სასამართლოში, დაცვის მხარემ ისინი უდავოდ მიიჩნია. შესაბამისად, მათი გამოკვლევა არ მოხდება სასამართლოში. უნდა აღვნიშნოთ, რომ წარმოდგენილი მტკიცებულებებით უტყუარად და ცალსახად დასტურდება ის გარემოება, რომ ბექა ჯაიანის მიერ ჩადენილი აქვს მისთვის ბრალად შერაცხილი ორივე დანაშაული", — განაცხადა პროკურორმა.

პროკურორი ასევე საუბრობს საქმეში არსებულ ნეიტრალურ მტკიცებულებებზე.

"არსებობს აუდიო მტკიცებულება, რომელშიც ბრალდებული საუბრობს თუ როგორ სცემდა ის აბრამიძეს, თუ ის მას გააბრაზებდა. ასევე სხვა ვიდეო და წერილობითი მტკიცებულებები და მოწმეები საქმეში ადასტურებს ბექა ჯაიანის მიერ განსაკუთრებული სისასტიკით, გენდერისა და იდენტობის ნიშნით მკვლელობას და ამავე ნიშნებით, სისტემატური ფსიქოლოგიურ და ფიზიკურ ძალადობას," — განაცხადა პროკურორმა.

შეგახსენებთ, რომ 2024 წლის 18 სექტემბერს 37 წლის ტრანსგენდერი ქალი, კესარია აბრამიძე, თბილისში, საკუთარ სახლში მოკლეს. განსაკუთრებული სისასტიკით, გენდერის ნიშნით განზრახ მკვლელობაში ბრალდებული 26 წლის ბექა ჯაიანი ქუთაისის აეროპორტის მიმდებარე ტერიტორიაზე დააკავეს.

გამოძიება სისხლის სამართლის კოდექსის 109-ე მუხლის "თ" და "მ" პუნქტებით მიმდინარეობს, რაც გენდერის ნიშნით განსაკუთრებული სისასტიკით დამამძიმებელ გარემოებაში ჩადენილი განზრახ მკვლელობას გულისხმობს.