პროკურატურის დღევანდელი განცხადება, კიდევ ერთი თვალსაჩინო დასტურია იმისა, თუ როგორ იყენებს ერთი პოლიტიკური პარტია მთლიან სამართალდამცავ სისტემას პოლიტიკური ბრძოლის იარაღად. ეს ნათლად მიანიშნებს დაშინებისა და შევიწროების ახალი ტალღის დაწყებაზე, — ასე ეხმაურება პროკურატურის განცხადებას ერთიანი ნეიტრალური საქართველოს მიმართვაზე გამოძიების დაწყებასთან დაკავშირებით სამოქალაქო იდეის ხელმძღვანელი თინა ხიდაშელი.

"პროკურატურის დღევანდელი განცხადება, კიდევ ერთი თვალსაჩინო დასტურია იმისა, თუ როგორ იყენებს ერთი პოლიტიკური პარტია მთლიან სამართალდამცავ სისტემას პოლიტიკური ბრძოლის იარაღად. ეს ნათლად მიანიშნებს დაშინებისა და შევიწროების ახალი ტალღის დაწყებაზე. „ქართული ოცნება“ აცნობიერებს, რომ მშვიდობიანი დემონსტრანტების ცემა, წამება, პატიმრობა არ არის საკმარისი საპროტესტო ტალღის შესაჩერებლად, ვერც ე.წ. პარლამენტის მიერ ყოველდღიურად ახალ-ახალი რეპრესიული კანონების მიღება აჩერებს გაბრაზებულ ადამიანებს.

სწორედ ამიტომ, შემოგვთავაზეს რეპრესიების კიდევ უფრო მძიმე ფორმა, რომლის საშუალებითაც ათეულობით ადამიანის უმძიმესი ბრალდებებით დაპატიმრების შესაძლებლობას ქმნიან. მიუხედავად იმისა, რომ არ არსებობს ამ აბსურდული ბრალდებების საფუძველი, დიქტატურის დამყარების პროცესში მყოფი რუსული ძალისგან არაფერია გამორიცხული, ვინაიდან სამშობლოს სიყვარულისთვის, რამდენიმე ათეული ჩვენი თანამებრძოლი უკვე იმყოფება საპატიმროებში.

პროკურატურის შეთითხნილი ბრალდებების არავის ეშინია!

ყველა მსგავსი ქმედება, კიდევ უფრო მეტად ადასტურებს ჩვენი ბრძოლის არა მხოლოდ სამართლიანობას, არამედ, აუცილებლობას, რომ არ დავკარგოთ სამშობლო და გასული საუკუნის ოციანი წლების 25 თებერვლის ტრაგედია კიდევ ერთხელ რომ არ დატრიალდეს საქართველოში", — განაცხადა თინა ხიდაშელმა.

შეგახსენებთ, რომ დღეს პროკურატურამ გაავრცელა ინფორმაცია იმის შესახებ, რომ ერთიანი ნეიტრალური საქართველოს მიმართვის საფუძველზე გამოძიება დაიწყო. საქმე შიდა თუ გარე აქტორების მიერ საქართველოს კონსტიტუციური წყობილებისა და უსაფრთხოებისთვის საფრთხის შემცველ მოქმედებებს.