ქართული ოცნების პარლამენტმა მე-3 მოსმენით მიიღო ცვლილებები ადმინისტრაციულ სამართალდარღვევათა და სისხლის სამართლის კოდექსებსა და შეკრება-მანიფესტაციის შესახებ კანონში — კანონი ხელმოსაწერად ოცნების მიერ არჩეულ პრეზიდენტს, მიხეილ ყაველაშვილს გადაეგზავნა.

ქართულმა ოცნებამ კანონპროექტში შესწორებები მეორე მოსმენის დროს შეიტანა — ასეთი რამე მე-3 მოსმენისას არ მომხდარა. ხსენებული ცვლილებები შეეხო შეკრება-მანიფესტაციების კანონის მე-9, მე-11 და მე-12 პრიმა მუხლის დარღვევისთვის გათვალისწინებულ პასუხისმგებლობებს, რომლებიც ადმინისტრაციული შენობების, გზების და მაგისტრალების ბლოკირებას ან შეკრებებზე ძალადობისკენ მოწოდებას, აკრძალული ნივთების ქონასა და გზის გადაკეტვას ითვალისწინებს.

პირველ ვერსიაში გათვალისწინებული იყო 5000-ლარიანი ჯარიმა საგნის კონფისკაციით, ხოლო ორგანიზატორის შემთხვევაში 15 000 ლარის ოდენობის ჯარიმა. შესწორებების თანახმად სანქცია 5000 ლარით ან 15 დღემდე ადმინისტრაციული პატიმრობით განისაზღვრა. ორგანიზატორის შემთხვევაში კი — 15 000 ლარის ოდენობის ჯარიმითა და 20 დღემდე პატიმრობით.

ქმედების განმეორებითი ჩადენა გამოიწვევს ადმინისტრაციულ პატიმრობას 25 დღემდე, ორგანიზატორის შემთხვევაში კი განისაზღვრა 60 დღემდე პატიმრობა.

აქციაზე სახის დაფარვის და ლაზერის ტარების აკრძალვის დარღვევა კანონის გამოქვეყნების დღიდან, გამოიწვევს დაჯარიმებას 2000 ლარით ან 7 დღემდე ადმინისტრაციულ პატიმრობას.