ირაკლი კობახიძე ყაზახეთის რესპუბლიკის პრეზიდენტს შეხვდა. მას კასიმ-ჟომარტ ტოკაევმა პრეზიდენტის სასახლეში უმასპინძლა.

კობახიძის თქმით, ყაზახეთთან პარტნიორობის განმტკიცება საქართველოს საგარეო პოლიტიკის ერთ-ერთი პრიორიტეტია.

"ეს არის ჩემი ერთ-ერთი პირველი ვიზიტი საპარლამენტო არჩევნების შემდეგ, რაც ცხადყოფს ჩვენს განსაკუთრებულ ინტერესს ჩვენს ქვეყნებსა და ერებს შორის თანამშრომლობის, პარტნიორობისა და მეგობრობის განმტკიცების მიმართ. ეს მეგობრობა ეფუძნება ძალიან მტკიცე ისტორიულ, ტრადიციულ ფესვებს. ასე რომ, ამ პარტნიორობის განმტკიცება არის საქართველოს საგარეო პოლიტიკის ერთ-ერთი პრიორიტეტი. პოლიტიკური თანამშრომლობა ჩვენს ქვეყნებს შორის ძალიან მნიშვნელოვანია ჩვენთვის. მადლობას მოგახსენებთ პირადად თქვენ და ყაზახეთს ჩვენი სუვერენიტეტისა და ტერიტორიული მთლიანობის მხარდაჭერისთვის. ჩვენი პოლიტიკური თანამშრომლობის შემდგომი გაღრმავება სხვადასხვა ფორმატის გამოყენებით ასევე ძალიან მნიშვნელოვანია. ძალიან მოხარული ვიქნებით, თუ ეწვევით ჩვენს ქვეყანას", — განაცხადა ირაკლი კობახიძემ.

ირაკლი კობახიძეს თანამდებობაზე ხელახლა დანიშვნა მიულოცა ყაზახეთის პრეზიდენტმა და ხაზი გაუსვა მის ძლიერ ლიდერობას.

"გილოცავთ საქართველოს პრემიერმინისტრის თანამდებობაზე ხელახლა დანიშვნას. საქართველო არის ყაზახეთის ძალიან მნიშვნელოვანი პარტნიორი და თქვენი დამსახურებული დანიშვნა მეტყველებს თქვენს ძლიერ ლიდერობაზე თქვენს ქვეყანაში. გისურვებთ წარმატებას", — განაცხადა ყაზახეთის რესპუბლიკის პრეზიდენტმა.

შეხვედრას ოცნების ხელისუფლების წარმომადგენლები: პირველი ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი, საგარეო საქმეთა მინისტრი მაკა ბოჭორიშვილი და მთავრობის ადმინისტრაციის უფროსი ლევან ჟორჟოლიანი დაესწრნენ.