საქალაქო სასამართლოში "თბილისი მოლთან" დაკავებული 8 პირის სხდომა მიმდინარეობს — შინაგან საქმეთა სამინისტრო ამ პირებს სტრატეგიული ან განსაკუთრებული მნიშვნელობის ობიექტის ჯგუფურად ბლოკირების მცდელობას ედავება.

დაკავებულთა შორის არის თბილისის ყოფილი მერი, გიგი უგულავაც. სხდომაზე სიტყვით გამოსვლისას, უგულავამ მომხდარს აბსურდი უწოდა და აღნიშნა, რომ მნიშვნელოვანი ამ მომენტში მზია ამაღლობელზე ლაპარაკია, რომელიც შიმშილობს და სიცოცხლისთვის იბრძვის.

"აბსურდი იყო ის, რაც მოხდა. ყველამ პირდაპირ ეთერში ნახა. მე მინდა, შეკითხვა დავუსვა აქ წარმოდგენილ ყველა ადამიანს: სადამდე აპირებს სისტემა ადამიანების წამებას, ცემას, გაუბედურებას, ეს შეკითხვა არ არის მხოლოდ შეკითხვა. იმედი მაქვს, როცა სახლში მიბრუნდებით, ამ შეკითხვას საკუთარ თავს უსვამთ ან ოჯახის წევრები გისვამენ. ასევე, მეორე შეკითხვა: რა მიზანს ემსახურება ყველაფერი ეს? მიზანი ხომ უნდა ჰქონდეს ამას?! მიზანი თუ არის, რომ ჩვენ ვიყოთ იზოლირებული მსოფლიოსგან ჩამოშორებული, გაუბედურებული ქვეყანა, რომელიც ემსახურება ერთი ადამიანის სრულიად გიჟურ და წარმოუდგენელ ოცნებებს, არ მგონია, რომ ეს თქვენი შვილები ან თქვენი ოცნება იყოს. სადამდე უნდა გაგრძელდეს? ამას ხომ უნდა ჰქონდეს ბოლო? ვინმეს აქვს იმის ილუზია, რომ დღეს თუ ჩვენ დაგვიჭერენ, ხვალ ათი იმდენი არ გამოვა? ეს ხომ არ დასრულდება ასე? ეს ხომ ზამბარაა, რომელსაც თქვენ წელავთ და მას ერთი გზა აქვს, როგორც კი ხელს გაუშვებს, ის უკან გიბრუნდება და გხვდება თქვენ.

[...] მე არ ვაპირებ აქ ჩემზე ლაპარაკს. როგორ უნდა ვილაპარაკო ჩემზე? ჩვენ მაინც ნორმალურად ვართ — მზია ამაღლობელი უკვე სიცოცხლისთვის იბრძვის, თქვენ თვითონაც კარგად იცით, რომ ამ თვალსაზრისით სასამართლო პრაქტიკასაც ეწინააღმდეგება. ამიტომ, ეს ბრძოლა არ გაჩერდება და ვერ გაჩერდება. ღმერთმა ნუ ქნას რომ გაჩერდეს, მაშინ საქართველო აღარ იარსებებს. მეოთხე თუ მეხუთე პატიმრობაა, მაგრამ მაინც ბედნიერი ვარ. კიდევ რომ ციხეში მივდიოდეთ, შეგნებულად მივდივართ ამაზე იმიტომ, რომ აქ აღარ არსებობს მეგობრებო შიში, რისი შიში უნდა იყოს? აგერ, მზია კვდება და ჩვენ ორღერძულა ხაზზე ვილაპარაკოთ? არ გამოვა ეს ასე. ამიტომ, რომ მიხვალთ სახლში, დაფიქრდით, მიზანი რა არის ამ ყველაფრის და სადამდე უნდა გაგრძელდეს ეს უბედურება. საქართველოს ისტორია, როცა გადმოხედავს ამ დღეებს, ასე დაიწერება: "შავი დღეები იდგა საქართველოში". დარწმუნებული ვარ მაინც, რომ გავიმარჯვებთ და ასეთი მარაზმი დასრულდება ამ ქვეყანაში. თავისუფლება მზია ამაღლობელს" — განაცხადა გიგი უგულავამ სხდომაზე.