ამერიკელმა მუსიკოსმა ჩაპელ როუნმა გრემის წლევანდელ დაჯილდოებაზე საუკეთესო ახალი არტისტის ნომინაციაში გაიმარჯვა. 26 წლის მომღერალმა თავის სამადლობელ სიტყვაში ხმისჩამწერი კომპანიები გააკრიტიკა და მუსიკოსებისთვის სათანადო ანაზღაურება და ჯანმრთელობის დაზღვევა მოითხოვა.

"საკუთარ თავს ვუთხარი, რომ ოდესმე თუ გრემის ავიღებდი და მუსიკის ინდუსტრიაში ყველაზე გავლენიანი ხალხის წინაშე გამოვიდოდი, მოვითხოვდი, ლეიბლებს, რომლებისთვისაც მუსიკოსებს მილიონობით დოლარის მოგება მოაქვთ, საარსებო ანაზღაურება და ჯანმრთელობის დაზღვევა შემოეთავაზებინათ, განსაკუთრებით, ახალბედა არტისტებისთვის", — განაცხადა ჩაპელმა ოვაციების ფონზე, — "ძალიან პატარა, ჯერ კიდევ არასრულწლოვანი ვიყავი, კონტრაქტი რომ გავაფორმე, ხოლო როცა მის გარეშე დავრჩი, არანაირი სამუშაო გამოცდილება არ მქონია და, უამრავი ადამიანი მსგავსად, ძალიან გამიჭირდა, პანდემიის პერიოდში სამსახური მეპოვა და დაზღვევა მქონოდა.

"ძალიან რთული იყო იმის დანახვა, რომ საკუთარ საქმეს მთელი გულით აკეთებ, მაგრამ სისტემა ზურგს გაქცევს და ადამიანად აღარ გთვლის. ხმისჩამწერი კომპანიები თავიანთ არტისტებს ისე უნდა მოეპყრონ, როგორც ღირებულ თანამშრომლებს — უნდა უზრუნველყონ ისინი სათანადო ანაზღაურებით, დაზღვევითა და დაცვით. ლეიბლებო, ჩვენ თქვენ გვერდით ვართ, მაგრამ ხართ კი თქვენ ჩვენს გვერდში?"

ჩაპელ როუნმა, რომლის ნამდვილი სახელი კეილი როუზ ამსტაცია, მუსიკალური კარიერა მოზარდობის ასაკში, საკუთარ იუთუბარხზე სიმღერების ატვირთვით დაიწყო. 2015 წელს მომღერალმა კონტრაქტი გააფორმა ერთ-ერთ უდიდეს ლეიბლთან, Atlantic Records-თან, მაგრამ ამ უკანასკნელმა 2020 წელს არტისტთან თანამშრომლობა შეწყვიტა. თუმცა, ჩაპელის ვარსკვლავური გზა სწორედ მას შემდეგ დაიწყო — 2023 წელს მან სადებიუტო ალბომი The Rise and Fall of a Midwest Princess გამოუშვა, რომელიც წლევანდელი გრემის ნომინანტი გახდა. განსაკუთრებული კომერციული წარმატება ხვდა როუნის სინგლს Good Luck, Babe!, რომელიც სხვადასხვა ჩარტში მოწინავე პოზიციებზე აღმოჩნდა.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...