აქტივისტ ისაკო დევიძის სახლში საპოლიციო ძალებმა 1-ელ თებერვალს ჯერ ჩხრეკა ჩაატარეს, შემდეგ კი დააკავეს. დევიძის ადვოკატის, ლაშა ტყეშელაძის თქმით, დაკავებულს პოლიციამ სცემა და სიტყვიერი შეურაცხყოფა მიაყენა. მისივე ინფორმაციით, აქტივისტმა შიმშილობა დაიწყო. ამ ფორმით ის რეჟიმის სხვა პატიმრებს უცხადებს სოლიდარობას.

ისაკო დევიძის დედის ტვ პირველთან ყვება, რომ სახლის ჩხრეკის შემდეგ, სახლიდან წაიღეს ლეპტოპები და 2000 ლარი, რომელიც ისაკომ დედის ოპერაციისთვის ისესხა.

"სახლში რომ შემოვედი, ჩემი სამუშაო ლეპტოპი, ჩემი მეორე შვილის სამუშაო ლეპტოპი და ისაკოს ლეპტოპი იყო წაღებული და ორი ათასი ლარი, საოპერაციო ფული მქონდა გადადებული, რამდენიმე დღის წინ ისაკომ გააკეთა სესხი და გამომიტანა და დადებული მქონდა თანხა, უნდა დამეგეგმა [ოპერაცია] თებერვლის თვეში და ის ფულიც არ არის," — განაცხადა ისაკოს დედამ "ტვ პირველთან".

რაც შეეხება დაკავების მიზეზებს, დაკავებულის ადვოკატის თქმით, ისაკო დევიძის სახლში ჩხრეკა და შემდეგ დაკავება 2 თებერვლის აქციას უკავშირდება.

"როცა პოლიციის შენობაში გადმოიყვანეს, ჰყავდათ ერთ-ერთ ოთახში, სადაც იყო შვიდამდე პოლიციელი, ზოგი გადიოდა, ზოგი შემოდიოდა, მაგრამ ეს არ იყო გამოკითხვა, რადგან არ მოაწერინეს ხელი, არ შეავსებინეს რაიმე – 4 საათის განმავლობაში მას უსვამდნენ კითხვებს, მაგალითად, ვინ უნდა გადაკეტოს გზა? ხვალ აქციაზე რა მოხდება? რა ტრენინგები გაიარეთ?

მე ეჭვი მქონდა, რომ უკავშირდებოდა ხვალინდელ აქციას, მაგრამ ისაკო დევიძის განმარტებებიდან გამომდინარე შემიძლია ვთქვა, რომ მაგაზე იყო – აბა, ხვალ რა მოხდება, ვინ ატარებს აქციას, რა მოხდება, როგორ უნდა მოხდეს, რამე ტრენინგი ხომ არ გაიარეთ. ისაკო დევიძემაც ეს გასცა პასუხი, რომ ამ აქციების ორგანიზატორი არის ხალხი. ისაკო დევიძემ დაიწყო შიმშილობა, ყველა იმ პოლიტპატიმრის, ქალბატონი მზიას სოლიდარულია", – განაცხადა ადვოკატმა, რომელიც კომენტარსაც მაუწყებელი ავრცელებს.

ეს საპოლიციო ძალების მიერ ისაკო დევიძის მეორე დაკავებაა. პირველად ის 19 ნოემბერს მელიქიშვილის გამზირზე დააკავეს. ისაკო დევიძეს წვრილმანი ხულიგნობისა და პოლიციელის კანონიერი მოთხოვნისადმი დაუმორჩილებლობის ბრალდებით 8-დღიანი პატიმრობა 20 ნოემბერს შეუფარდეს, რის შემდეგაც მან მშრალი შიმშილობა გამოაცხადა.