საქსტატის წინასწარი შეფასებით, 2024 წლის დეკემბერში, საქართველოს ეკონომიკა 6.7%-ით გაიზარდა.

საქსტატის აღმასრულებელი დირექტორის გოგიტა თოდრაძის თქმით, ზრდა იყო საფინანსო და სადაზღვევო, პროფესიულ, სამეცნიერო და ტექნიკური საქმიანობების, ტრანსპორტისა და დასაწყობების, ვაჭრობისა, ინფორმაცია და კომუნიკაციის სექტორებში.

"საფინანსო და სადაზღვევო საქმიანობების სექტორში ზრდა ძირითადად განაპირობა კომერციული ბანკების საპროცენტო შემოსავლების ზრდამ. ტრანსპორტი და დასაწყობების სექტორში ზრდა დაკავშირებული იყო სახმელეთო და საჰაერო ტრანსპორტის ფუნქციონირებასთან, ასევე, უნდა აღინიშნოს, საგარეო ვაჭრობის მაჩვენებლების ზრდის პარალელურად გაზრდილია ტვირთის სატრანსპორტო დამუშავების და დასაწყობების მაჩვენებელი. ვაჭრობის სექტორში ზრდა ძირითადად დაკავშირებული იყო მსუბუქი ავტომობილებით და მათი დეტალებით ვაჭრობის მოცულობის გაფართოებასთან. გაზრდილია ასევე საბითუმო ვაჭრობა ბუნებრივი აირით და საცალო ვაჭრობა კვების პროდუქტებით, სასმელებით და თამბაქოს ნაწარმით. რაც შეეხება ინფორმაცია და კომუნიკაციის სექტორს, ზრდა დაკავშირებული იყო კომპიუტერული პროგრამირების, კონსულტირების და მათთან დაკავშირებული საქმიანობის მომსახურების მოცულობის გაფართოებასთან. პროფესიული, სამეცნიერო და ტექნიკური საქმიანობების სექტორში კი ზრდა უკავშირდებოდა საბუღალტრო, სააღრიცხვო და აუდიტორული მომსახურების მომსახურების გაფართოებასთან, ასევე ბიზნესის და მართვის საკითხებში საკონსულტაციო საქმიანობის მოცულობის ზრდასთან.