ამბები დიქტატურაზე — "საზოგადოებრივი მაუწყებლის მცველების" მზია ამაღლობელის მხარდასაჭერად 24-საათიან რეჟიმში კითხვას აგრძელებენ. ისინი ტელევიზიის ფოიეში უწყვეტ რეჟიმში კითხულობენ 1937 წელს რეპრესირებულთა და გასამართლებულთა ისტორიებს, სადამსჯელო ოქმებს და ამონარიდებს მარია რესას წიგნიდან "როგორ დავამარცხოთ დიქტატორი."

"საზმაუს მცველები, საზოგადოებრივი მაუწყებლის იდეის დასაცავად გაერთიანებული თანამშრომლები ვართ, ჩვენთვის ჟურნალისტის და ორი დამოუკიდებელი გამოცემის "ბათუმელების" და "ნეტგაზეთის" დამფუძნებლის განსასჯელის სკამზე ყურება, ადრე თუ გვიან, საკუთარი მომავლისთვის თვალის გასწორებას ჰგავს, მზიას სახით დღეს იქ სწორედ დამოუკიდებელი მედია ზის განსასჯელის სკამზე." — აცხადებენ საზოგადოებრივი მაუწყებლის მცველები.

მზია ამაღლობელი 14 იანვარს, საკუთარ სასამართლო პროცესზე სწორედ ამ წიგნით გამოცხადდა.

"საზოგადოებრივი მაუწყებლის მცველებმა" კითხვა 28 იანვარს, 19:00 საათზე დაიწყეს, პროცესი 29 იანვრის 19:00 საათამდე გაგრძელდება.