29 იანვარს კენჭი ეყრება ევროსაბჭოს რეზოლუციის ტექსტს, რომელშიც საუბარია ქართული ოცნებისათვის ვადამდელი არჩევნების დანიშვნისა და პოლიტპატიმრების გათავისუფლების მოთხოვნაზე და, ასევე, ოცნების დელეგატებზე შეზღუდვების დაწესებაზე.

რეზოლუციის ერთ-ერთ პუნქტში მოცემულია მოთხოვნა ვადამდელი არჩევნების დანიშვნის შესახებ და, ამასთან, მასში ხაზგასმულია საქართველოს დემოკრატიული უკუსვლა, ძალოვნების მხრიდან ძალადობა და მათი დაუსჯელობა.

"დაუყოვნებლივ დაიწყოს ინკლუზიური პროცესი, რომელშიც ჩართული იქნება ყველა მხარე და სოციალური აქტორი, მათ შორის მმართველი უმრავლესობა, ოპოზიცია და სამოქალაქო საზოგადოება, რათა სასწრაფოდ აღმოიფხვრას ბოლო საპარლამენტო არჩევნების დროს გამოვლენილი ხარვეზები და გაუმართაობები და შეიქმნას ისეთი საარჩევნო გარემო, რომელიც ხელშემწყობი იქნება ჭეშმარიტად დემოკრატიული ახალი არჩევნებისთვის, რომელიც მომდევნო თვეების განმავლობაში უნდა გამოცხადდეს", — ვკითხულობთ რეზოლუციაში.

რეზოლუციაში არის წარმოდგენილი მოთხოვნა, ქართულმა ოცნებამ გაათავისუფლოს პოლიტპატიმრები ევროსაბჭოს საპარლამენტო ასამბლეის აპრილის სესიამდე.

ტექსტი, "პოლიციის დაუნდობლობისა და ადამიანის უფლებათა სხვა შელახვისა და შესაბამისი ფაქტების გამოუძიებლობის დაგმობის ცხად ნიშნად" ასამბლეაში ქართული ოცნების დელეგატებისთვის გარკვეული უფლებების ჩამორთმევასაც ითვალისწინებს.

რეზოლუციაში წერია, რომ აღნიშნული პრობლემების გადაჭრის შემთხვევაში, შესაძლებელი იქნება შეზღუდვების მოხსნა.

ტექსტით გათვალისწინებული შეზღუდვების მიხედვით, ოცნების დელეგატებს აღარ ექნებათ:

• პოლიტიკურ საქმეთა და დემოკრატიის, მონიტორინგის, სამართლებრივი საქმეებისა და ადამიანის უფლებების, ადამიანის უფლებათა ევროპული სასამართლოს მოსამართლეთა არჩევის, პროცედურული კანონების, იმუნიტეტისა და ინსტიტუციურ საქმეთა კომიტეტების სრული ან მოადგილეობრივი წევრობის უფლება;
• არჩევნების დამკვირვებელი კომიტეტების წევრობის უფლება; მომხსენებლად დანიშვნის უფლება;
• ასამბლეის საპრეზიდენტო ოფისის, კომიტეტის ან ქვეკომიტეტის თავმჯდომარის ან ვიცე თავმჯდომარის კანდიდატად წარდგენის უფლება;
• უფლება წარმოადგინონ ასამბლეა ევროპის საბჭოს ორგანოებში ბიუროს გადაწყვეტილებით და უფლება წარმოადგინოს ასამბლეა პერიოდულად ევროპის საბჭოს ორგანოების, საერთაშორისო ორგანიზაციების ან საპარლამენტთაშორისო ასამბლეების მიერ ორგანიზებულ ღონისძიებებზე, შეხვედრებზე, კონფერენციებზე.

რეზოლუციის ტექსტში წარმოდგენილია ოცნებისადმი მოთხოვნა, რომ გაითვალისწინონ ვენეციის კომისიის რეკომენდაციები, რომლებიც აღნიშნული იქნება საქართველოსთან დაკავშირებულ სასწრაფო მოსაზრებაში. ამ მოსაზრების შემუშავება კომისიას ასამბლეის პრეზიდენტმა სთხოვა. აღნიშნული მოთხოვნების დაკმაყოფილების შემთხვევაში, გათვალისწინებულია ჩამოთვლილი შეზღუდვების მოხსნის საკითხი.

რეზოლუციას კენჭი 29 იანვარს ეყრება.