სახის დამფარავი საშუალებების აქციაზე ტარებისთვის, ზუგდიდის რაიონულმა სასამართლომ "დროას" წარმომადგენელი მარიამ სიჭინავა 2000 ლარით დააჯარიმა. ამჯერად იგი სამართალდამრღვევად 23 იანვარს, აქციაზე შარფის სახეზე შემოხვევის გამო სცეს.

სხდომაზე მყოფმა შსს-ს გამომძიებელმა აღნიშნა, რომ მარიამ სიჭინავას დაფარული ჰქონდა სახე და მიუხედავად იმისა, რომ ინფორმირებული იყო, მიზანმიმართულად დაარღვია ადმინისტრაციულ სამართალდარღვევათა კოდექსის 174-ე მუხლის მეხუთე ნაწილი.

აღნიშნულ სასამართლო სხდომაზე, სიჭინავა "ოცნების" დამფუძნებლისა და საპატიო თავმჯდომარის, ბიძინა ივანიშვილის გამოსახულებიანი ნიღბით მივიდა და დარბაზი პროტესტის ნიშნად შემდეგი შეძახილით დატოვა — "არა ოლიგარქიას"

სხდომის დარბაზი დაატოვებინეს სამოქალაქო აქტივისტ კერენ ესებუას, რომელმაც ხმამაღლა გააჟღერა მოთხოვნა: “თავისუფლება მზია ამაღლობელს”.

ცნობისთვის, "ბათუმელებისა“ და "ნეტგაზეთის“ დამფუძნებელი მზია ამაღლობელი 11 იანვარს დააკავეს ადმინისტრაციული წესით, შემდეგ კი გამოუშვეს და რამდენიმე საათში, — უკვე 12 იანვარს, — კვლავ დააკავეს. მას ედავებიან სისხლის სამართლის დანაშაულს, "პოლიციელზე თავდასხმას". მზია ამაღლობელს 4-დან 7 წლამდე პატიმრობა ემუქრება.

კოლეგები, სამოქალაქო საზოგადოება, პოლიტიკოსები და საერთაშორისო უფლებადამცველი ორგანიზაციები მზია ამაღლობელის დაპატიმრებას უკანონოდ მიიჩნევენ და „ქართულ ოცნების“ ხელისუფლებას მისი გათავისუფლებისკენ მოუწოდებენ. მზია ამაღლობელი უკვე მე-16 დღეა შიმშილობს.