FIFA-ს ყოფილი პრეზიდენტი, სეფ ბლატერი, რომელსაც ფეხბურთის სფეროში მუშაობა 6 წლით აქვს აკრძალული, აცხადებს, რომ UEFA-ს კენჭისყრები ყალბდებოდა, მაგრამ FIFA-ში მსგავსი რამ არ მომხდარა.

ერთ-ერთ არგენტინულ გამოცემასთან საუბარში, ბლატერმა გაყალბების მეთოდზეც ისაუბრა. მისი თქმით, კენჭისყრამდე ბურთულებს, რომლებშიც გუნდების სახელებია მოთავსებული მაცივარში დებენ და აცივებენ ან აცხელებენ. კენჭისყრისას, ადამიანი, რომელსაც ბურთულები თასიდან ამოაქვს, იცის, რომელ ბურთულაში რომელი გუნდია და ამის მიხედვით აწყვილებს მატჩებს.

"მე შევსწრებივარ მსგავს ფაქტს UEFA-ს კენჭისყრების დროს, მაგრამ FIFA-ში იგივე რამ არ მომხდარა", განაცხადა ბლატერმა.

ევროპის საფეხბურთო ასოციაციამ ბრიტანულ Sky Sports-ს განუცხადა, რომ ბლატერის ბრალდებები უსაფუძვლოა და ამ თემაზე კომენტარის გაკეთებაც არ ღირს.