"როცა გარიგებაზე მიდიხარ ეშმაკთან, განსაკუთრებით იმ ეშმაკთან, რომელიც დღეს კრემლში ზის, მერე ამ გარიგებას თავს ვეღარ დააღწევ – ამიერიდან შენს მომავალს ეშმაკი განსაზღვრავს", — ამის შესახებ ევროპარლამენტარმა პეტრას აუსტრევიჩიუსმა რადიო თავისუფლებასთან ბელარუსსა და საქართველოს შორის საერთო მახასიათებლებზე საუბრისას განაცხადა.

"ჰაჰაჰა — ოცნება რამდენი ხანია ძალაუფლებაშია, 12 წელი, ხომ? ლუკაშენკასთან შედარებით თინეიჯერები არიან, ლუკაშენკამ უკვე 31 წელიწადია, რაც ძალაუფლება ჩაიგდო ხელში და არ თმობს. ყველა ბერკეტი ხელში უჭირავს, სრულიად ალაგმა, განდევნა ან გაანადგურა ნებისმიერი ოპოზიცია. ის ფლობს ბელარუსს, ამის თქმა თავისუფლად შეიძლება. საბჭოთა ტერმინები რომ გავიხსენოთ, ის მართლაც "კოლმეურნეობის თავმჯდომარეა". დილით დგება, მიდის მინდვრებში, აქეთ-იქით თითს იშვერს, გასცემს ბრძანებებს: "ეს გააკეთე", "ის გააკეთე". ეს მისი სტილია. საქართველოში ცოტა სხვანაირად უდგებიან საქმეს — აქ "ნახევრად კოლმეურნეები" არიან, "კოლმეურნეები კოსტიუმში" — ნახევრად საბაზრო ეკონომიკის პრინციპებით მოქმედებენ და ასე შემდეგ, მაგრამ ეს ყველაფერი მხოლოდ ფასადურია, თვალში ნაცრის შესაყრელად. საერთო მახასიათებელი ბელარუსსა და საქართველოს შორის ის არის, რომ როცა გარიგებაზე მიდიხარ ეშმაკთან, განსაკუთრებით იმ ეშმაკთან, რომელიც დღეს კრემლში ზის, მერე ამ გარიგებას თავს ვეღარ დააღწევ – ამიერიდან შენს მომავალს ეშმაკი განსაზღვრავს", — განაცხადა აუსტრევიჩიუსმა.

ამასთან ერთად ევროპარლამენტარი ამბობს, რომ საქართველო ბელარუსთან შედარებით უფრო დინამიკური ქვეყანაა – "ქართველებს სხვა გამოცდილება აქვთ, მათ დემოკრატიის გემო გასინჯეს და საერთაშორისო ასპარეზზეც მეტი კავშირები აქვთ. მაგრამ, მაინც, როდესაც საქართველოს ვუყურებ, როდესაც ვხედავ, საით მიდის, პესიმიზმი მიპყრობს... აშკარაა, რომ არის რაღაც გეგმა და ეს გეგმა თბილისში არ დახაზულა, ცოტა ზემოთ, ჩრდილოეთისკენ შეიმუშავეს. მათი სტრატეგიაა, საქართველო ევროპულ გზას ჩამოაშორონ".

მისი თქმით, ქართულ ოცნებაში თვლიან, რომ ძალიან ჭკვიანები არიან და თან ხელშეუხებელნი, რომ შეუძლიათ ორმაგი თამაში ითამაშონ: ერთი მხრივ, ევროპასთან პარტნიორობა უნდათ, ძირითადად ვაჭრობის თემებში, რადგან ფული უყვართ, ფული კაია. მაგრამ პოლიტიკას რაც შეეხება, იქ ისე გვინდა ვიყოთ, როგორც ჩვენ გვაწყობს — ამჟამად კი მზარდად ავტორიტარულ რეჟიმად ყოფნა აწყობთ.

ევროპარლამენტარი ამბობს, რომ იმასაც ელოდება, რომ "ქართული ოცნების წარმომადგენლები ევროკავშირის ინსტიტუტებშიც მოვლენ, მათ შორის, ევროპარლამენტშიც". რადიო თავისუფლების ჟურნალისტის კითხვაზე — რა სტატუსით "მოვლენ ევროპარლამენტში"? აუსტრევიჩიუსის პასუხი ასეთი იყო:

"შენობაში შესვლა აკრძალული არ აქვთ. თუ რომელიმე ევროპარლამენტარი მათთვის საშვებს დაუშვებს, შეეძლებათ შემოვიდნენ. ოფიციალური მოწვევა, რა თქმა უნდა, არ იქნება, მაგრამ იქნება ე.წ. დერეფნების შეხვედრები, ფოტოებს გადაიღებენ და მერე იტყვიან, რომ რაღაც კეთდება, საქმე წინ მიდის, თანამოაზრე ევროპარლამენტარებიც გვყავს, რომლებთანაც ვთანამშრომლობთ".

რაც შეეხება მოლოდინებს ევროპარლამენტარი ამბობს, რომ ერთიანი პოლიტიკა ექნებათ — დაწყებული საგარეო ურთიერთობების სამსახურით, გაგრძელებული კომისიით და რაც შეიძლება მეტი წევრი სახელმწიფოს ჩართულობით.

"ყველას დათანხმება ალბათ ვერ მოხერხდება - უნგრეთის და სლოვაკეთის ფონზე - მაგრამ ხაზი უნდა გავუსვათ, რომ თუ არაფერი გავაკეთეთ, ეს ძვირად დაგვიჯდება – პარტნიორს ვკარგავთ. მზად ვართ, ასე იოლად შეველიოთ კანდიდატ ქვეყანას? საქართველოს სულისთვის ბრძოლა ჯერ არ დამთავრებულა, მეტიც, უშუალოდ ჩვენ ჯერ არც კი გვიბრძოლია, მხოლოდ შეშფოთებებით შემოვიფარგლეთ, რაღაცები გავაკრიტიკეთ და ა.შ. დიდი იმედი მაქვს, რომ ევროკავშირის ახალი ხელმძღვანელობა უფრო სერიოზულად მიუდგება ამ საქმეს, გაცნობიერებული ექნება გეოპოლიტიკური შედეგები, რაც ამ ყველაფერს მოჰყვება, თუ ასე, დღისით-მზისით გაგვძარცვეს. თუ ამას დაუშვებ, თუ არ შეეწინააღმდეგები, რა შთაბეჭდილება რჩებათ სხვებს? რომ პარტნიორებს გასაჭირში მიაგდებ, თანაც დაუფიქრებლად", — ამბობს პეტრას აუსტრევიჩიუსი.