თბილისის მერის კახა კალაძის განცხადებით, ავტობუსებისა და მიკროავტობუსების გადახდის აპარატებზე, სავარაუდოდ, კიბერშეტევა განხორციელდა, რომლის დეტალებს გამოძიება დაადგენს.

როგორც მან შესაბამისი კითხვის საპასუხოდ განაცხადა, მიუხედავად მომხდარისა, საზოგადოებრივი ტრანსპორტი მოქალაქეებს ჩვეულებრივ რეჟიმში ემსახურება.

"ავტობუსებში და მიკროავტობუსებში დამონტაჟებული გადახდის აპარატები "საქართველოს ბანკისაა". როგორც ვიცი, „საქართველოს ბანკს“ ემსახურება რამდენიმე კომპანია, შპს "აზრი", შპს "მს+". სავარაუდოდ, განხორციელდა კიბერშეტევა, თუმცა საიდან, ვისი ჩართულობით, როგორ, ამას გამოძიება აუცილებლად დაადგენს. გადახდები შეჩერებულია ავტობუსებსა და მიკროავტობუსებში, რადგან შეუძლებელია. აპარატები ვერ მუშაობს, თუმცა საზოგადოებრივი ტრანსპორტი, რა თქმა უნდა, აგრძელებს მუშაობას და ემსახურება დედაქალაქის მოსახლეობას. გადახდას ვერ ახერხებენ მგზავრები, შესაბამისად, ტრანსპორტი უფასოდ მოემსახურება მოსახლეობას. გამოძიება დაადგენს, თუ საიდან, როგორ მოხდა ეს ყველაფერი და ვის მიერ განხორციელდა კიბერშეტევა", — განაცხადა კახა კალაძემ.

მოქალაქეები სოციალურ ქსელში ავრცელებენ საზოგადოებრივ ტრანსპორტში გადაღებულ ვიდეოებს, სადაც საქართველოს პირველი პრეზიდენტის, ზვიად გამსახურდიას და პარლამენტის თავმჯდომარე, ზურაბ ჟვანიას ცნობილი გამოსვლების პარალელურად "ოცნების" საპატიო თავმჯდომარის, ბიძინა ივანიშვილის და "ოცნების" პრეზიდენტ მიხეილ ყავლაშვილის ხმები ისმის.