აშშ-ის ფედერალურმა მოსამართლემ სიეტლში დროებით შეაჩერა პრეზიდენტ დონალდ ტრამპის აღმასრულებელი განკარგულება, რომელიც ზღუდავს ამერიკაში დაბადებულთა უფლებას აშშ-ის მოქალაქეობაზე. ამის შესახებ CNN და BBC იტყობინებიან.

მოსამართლე ჯონ კოფენურმა დოკუმენტს უწოდა "უხეშად არაკონსტიტუციური განკარგულება", მან ასევე დასვა შეკითხვა, რას აკეთებდნენ ადვოკატები, როცა განკარგულების ხელმოწერის შესახებ გადაწყვეტილება მიიღეს.

BBC-ის კორესპონდენტის ცნობით, სასამართლო სხდომა 25 წუთზე მეტ ხანს არ გაგრძელებულა.

ამ განკარგულების დაბლოკვის მიზნით სარჩელი შეიტანეს გენერალურმა პროკურორებმა 22 შტატიდან.

დოკუმენტში, რომელსაც დონალდ ტრამპმა ხელი მოაწერა, ნათქვამია, რომ დაბადებით მოქალაქეობის უფლება არ ვრცელდება იმ ბავშვებზე, რომელთა მშობლები არალეგალურად იმყოფებიან შეერთებულ შტატებში.

აშშ-ის მიწაზე დაბადებული ნებისმიერი პირისთვის აშშ-ის მოქალაქეობის უფლება გარანტირებულია აშშ-ის კონსტიტუციის მე-14 შესწორებით.

"პრეზიდენტს არ შეუძლია, კალმის ერთი მოსმით გააუქმოს მე-14 შესწორების არსებობა. წერტილი", — განაცხადა ნიუ-ჯერსის გენერალურმა პროკურორმა მეტ პლატკინმა.

თეთრ სახლში ხაზგასმით აღნიშნეს, რომ მზად არიან სასამართლო პროცესისთვის.