დემირელის კერძო კოლეჯის მოსწავლეები და მათი მშობლები სამშაბათს, 5 სექტემბერს, 13 საათზე აქციას გამართავენ. ისინი განათლებისა და მეცნიერების სამინისტროს შენობასთან დემირელის სკოლისთვის ავტორიზაციის გაუქმებას გააპროტესტებენ:

"გთხოვთ ყველას შემოგვიერთდეთ ჩვენი შვილების ფუნდამენტური უფლებების დასაცავად, რომელსაც ასე ცინიკურად ლახავს ქვეყნის ხელისუფლება", - წერს ფეისბუკზე აქციის ორგანიზატორი თენგო შენგელაია.

2017 წლის 29 აგვისტოს ზოგადსაგანმანათლებლო დაწესებულების ავტორიზაციის საბჭომ დემირელის სახელობის კერძო კოლეჯს უარი უთხრა ავტორიზაციის მინიჭებაზე. განათლების ხარისხის განვითარების ეროვნულ ცენტრში On.ge-ს უთხრეს, რომ სკოლამ თავად შეიტანა განაცხადი რეავტორიზაციაზე, თუმცა პროცედურა ვერ გაიარა. როგორც ცენტრში ამბობენ, დარღვეული იყო ინფრასტრუქტურასთან, რესურსებთან და პერსონალთან დაკავშირებული სტანდარტები, ასევე, გამოიკვეთა კანონდარღვევებიც.

საქართველოში, ფეტულა გიულენის ჩაღლარის საგანმანათლებლო ქსელში შემავალი რვა დაწესებულებიდან ორს ავტორიზაცია უკვე შეუწყდა. დემირელის სკოლა ერთი წლის განმავლობაში ვეღარ გააგრძელებს საგანმანათლებლო საქმიანობას.

მანამდე ავტორიზაცია ჩამოერთვა ბათუმში მდებარე შაჰინის სკოლა-ლიცეუმს. მეოთხე თვეა წინასაექსტრადიციო პატიმრობა აქვს მისჯილი თურქეთის მოთხოვნით დაკავებულ მუსტაფა ემრე ჩაბუქს, რომელიც 15 წელია საქართველოში ცხოვრობს და საგანმანათლებლო სისტემაში მოღვაწეობს. ის დემირელის კოლეჯის მენეჯერი იყო.