21 იანვარს ევროპარლამენტში საქართველოს შესახებ დებატები გაიმართა. ევროპარლამენტარებმა ისაუბრეს ქვეყანაში მიმდინარე მოვლენებზე, ქვეყნის სხვადასხვა ქალაქში მიმდინარე უწყვეტ პროტესტზე და "ქართული ოცნების" მხრიდან გადადგმულ პროტესტის გამომწვევ ნაბიჯებზე.

დებატებში სიტყვით გამოვიდნენ შინაგან საქმეთა და მიგრაციის ევროკომისარი მაგნუს ბრუნერი, ევროპარლამენტარები — რასა იუნკევიჩიანე, ტობიას კრამერი, მალგორზატა გოშიევსკა, ტიერი მარიანი, რიჰარდს კოლსი, მარი ლუაზო, რაინიე ვან ლანშოტი და სერგეი ლაგოდინსკი.

მაგნუს ბრუნერი შეეხო აქციის უკანონოდ დაკავებული მონაწილეების საკითხს — ევროკომისრის განცხადებით, იმ სამართალდამცავების მიმართ, რომლებიც ადამიანებზე ძალადობაში მონაწილეობდნენ, არც ერთი ბრალდება არ არის წაყენებული.

"ბევრი დაკავებული პატიმრობაში რჩება და სისხლის სამართლით გასამართლება ემუქრებათ, თუმცა დღემდე სამართალდამცავი ორგანოების არცერთი წარმომადგენლის მიმართ ბრალდება წაყენებული არ არის პროტესტების ძალადობრივი დარბევებისა და დაკავებული დემონსტრანტების წამების სერიოზული ბრალდებების მიუხედავად, რაც საქართველოს ომბუდსმენმა გააჟღერა.

მსგავსი ქმედებები არ შეესაბამება ევროკავშირის კანდიდატის სტატუსის მქონე ქვეყანას. ევროკავშირი სოლიდარობას უცხადებს ქართველ ხალხს და მოვუწოდებთ ოფიციალურ პირებს, სწრაფი ქმედება განახორციელონ, რათა დაძაბულობა განმუხტონ. უსამართლოდ დაპატიმრებულები უნდა გაათავისუფლონ, ძალადობის აქტები უნდა გამოიძიოს და ანგარიშვალდებულება უნდა იყოს სამართალდამცავებისთვის, რომლებიც ჩართული იყვნენ ამ უკანონო ქმედებებში", — განაცხადა ბრუნერმა.

რასა იუკნევიჩიანემ ევროკავშირის ლიდერებს, წევრ სახელმწიფოებს და სხვა საერთაშორისო ორგანიზაციებს მოუწოდა, თავი შეიკავონ ყველა ქმედებისგან, რაც თვითდანიშნული ოცნების ხელისუფლების ლეგიტიმაციას შეუწყობს ხელს.

"მამაცი ქართველები 50 დღეზე მეტია აპროტესტებენ თავიანთი ევროპული მომავლის მოპარვას მიუხედავად ქართული ოცნების ხელისუფლების მხრიდან სისასტიკისა და ძალადობისა. სხვათა შორის, ქუჩაში გამოსული ადამიანები მათ "კრემლის ოცნების" "რუსეთის ოცნების" პარტიას ეძახის. მაშინ, როცა ქართველები იბრძვიან ევროპული გზისთვის, ჩვენი მოვალეობაა, ვიყოთ მკაფიო ჩვენს მხარდაჭერაში: პირველი, ქართველი ხალხის ერთადერთი ნამდვილი და ლეგიტიმური წარმომადგენელი და ერთადერთი აღიარებული თანამდებობის პირი არის სალომე ზურაბიშვილი, მეორე — ქართული ოცნება და თვითგამოცხადებული ერთპარტიული პარლამენტი არ არის ლეგიტიმური ხელისუფლება, მოვუწოდებ ევროკავშირის ლიდერებს, წევრ სახელმწიფოებს და სხვა საერთაშორისო ორგანიზაციებს, თავი შეიკავონ ყველა ქმედებისგან, რაც მოახდენს თვითდანიშნული ქართული ოცნების ხელისუფლების ლეგიტიმაციას", — აღნიშნა რასა იუკნევიჩიანემ.

ევროპარლამენტარმა სერგეი ლაგოდინსკიმ ირაკლი კობახიძესა და მიხეილ ყაველაშვილს მიმართა და მოუწოდა, არჩევნები ხელახლა ჩაატარონ.

"ქართველების დემოკრატიული მომავლის შესახებ ოცნება თანხვედრაშია ევროპულ ოცნებასთან. და ეს არის საქართველოს ნამდვილი ოცნება, მაგრამ პარტია, რომელიც საკუთარ თავს ქართულ ოცნებას ეძახის, თავისი ძალაუფლების სრულ ძალას იყენებს, რათა გაასამართლოს ჟურნალისტები, თავს დაესხას მშვიდობიან დემონსტრანტებს და ოპოზიციის წევრებს, ყოფილ პრემიერ-მინისტრ გიორგი გახარიასაც, რომელსაც სულ რამდენიმე დღის წინ სასტიკად დაესხნენ თავს.

ასე რომ, ვკითხულობ: ირაკლი კობახიძევ და მიხეილ ყაველაშვილო, გეკითხებით, სადამდე ხართ მზად ესაკალაციისთვის? თქვენს ხალხს მხოლოდ ერთი რამ სურს — არჩევნების ხელახლა ჩატარება დემოკრატიულ პირობებში. და ეს უნდა მისცეთ მათ. ეს არის უფლება, რომლისთვისაც იბრძვიან და არ უნდათ რომ აწამონ", — განაცხადა ლაგოდინსკიმ.

ანალოგიური იყო მოთხოვნები, რომლებიც რაინიე ვან ლანშოტმა, ტობიას კრამერმა, მალგორზეტა გოშიევსკამ, მარი ლუაზომ და რიჰარდს კოლსმა გააჟღერეს. თითოეულმა მათგანმა მოუწოდა ევროკომისიას, სანქცირების საკითხში უფრო მოქნილი და მკაფიო იყოს.

ტრადიციულად, განსხვავებული აზრი გამოთქვა ევროპარლამენტარმა ტიერი მარიანმა. ფრანგი ევროპარლამენტარის სიტყვებით, "საქართველო ბრიუსელის კოლონია არ გახდება".

"ბრიუსელმა მეტი უნდა გააკეთოს — ეს ბუნდესტაგის საგარეო ურთიერთობათა კომიტეტის თავმჯდომარემ თქვა. მაგრამ რატომ უნდა მოვახდინოთ გავლენა სუვერენული ხალხის დემოკრატიულ გადაწყვეტილებაზე? ჩვენ ერებს შორის ურთიერთპატივისცემა გვჭირდება. საქართველოში ძალაუფლება ხალხს აქვს. 20 დეკემბერს გამოქვეყნდა დასკვნა საქართველოს შესახებ, სადაც ნათქვამია, რომ უცხოური ჩარევა არ ყოფილა. ჩარევას ბრიუსელი აძლიერებს. მაგალითად, იქ ბევრი პოლიციელი დაშავდა და ბრიუსელი ქაოსის მონაწილეა. ეს თავისუფალი ქვეყანაა. საქართველოს სურს ევროპა, რომელიც მათ არჩევანს პატივს სცემს. საქართველო ბრიუსელის კოლონია არ გახდება", — განაცხადა მარიანიმ.