ბათუმში, სპეციალურ საგამოძიებო სამსახურთან ჟურნალისტებმა მზია ამაღლობელის მხარდამჭერი საპროტესტო აქცია გამართეს.

აქციის მონაწილეები სპეციალურ საგამოძიებო სამსახურს მოუწოდებენ, რომ სწრაფად გამოიძიონ ბათუმის საქალაქო სამმართველოს უფროსის ირაკლი დგებუაძის მხრიდან, ბათუმელებისა და ნეტგაზეთის დამფუძნებლის, მზია ამაღლობელის მიმართ არაადამიანური მოპყრობის ფაქტი. მათი თქმით, ეს საქციელი იყო ძალადობრივი და ღირსების შემლახავი და უნდა დადგეს ირაკლი დგებუაძის სისხლის სამართლის პასუხისმგებლობა.

"დღევანდელი აქციის მიზანია ის, რომ მოვუწოდებთ სპეციალურ საგამოძიებო სამსახურს, სწრაფ ტემპში გამოიძიონ მზია ამაღლობელის მიმართ ჩადენილი უკანონო საქციელი, რომელიც ბათუმის საქალაქო სამმართველოს უფროსმა, ირაკლი დგებუაძემ ჩაიდინა. ეს საქციელი იყო ძალადობრივი და ღირსების შემლახავი. მოვითხოვთ, რომ დადგეს ირაკლი დგებუაძის სისხლის სამართლის პასუხისმგებლობა. რაც შეეხება მზია ამაღლობელის დაკავების ფაქტს, ეს, ჩემი აზრით, არის მიზანმიმართულად მედიის მიმართ განხორციელებული ზეწოლა და პოლიტიკური პატიმარია მზია ამაღლობელი და ყველა ის ადამიანი, რომელიც რეჟიმის ტყვეობაშია, — განაცხადა აქციაზე მყოფმა საერთაშორისო გამჭვირვალობა საქართველოს წარმომადგენელმა, გოჩა მჟავანაძემ.

უფლებადამცველი და არასამთავრობო ორგანიზაცია "ჩვენი უფლებებისთვის" ხელმძღვანელი, თამაზ ბაკურიძე NEWS.On.ge-სთან საუბრისას ამბობს, რომ მზია ამაღლობელი არც ერთ ხელისუფლებას არ ემსახურებოდა, ის ემსახურებოდა სამართალს და ის ციხეში ყოფნას არ იმსახურებს.

"მზია ამაღლობელი არც ერთ ხელისუფლებას არ ემსახურებოდა, ის ემსახურებოდა სამართალს. მე გავიხსენებ სააკაშვილის პერიოდს, როცა ყველა ტელევიზია ერთ ენაზე საუბრობდა, ერთადერთი გაზეთი იყო ბათუმელები, რომელიც ამბობდა სიმართლეს. მზია ამაღლობელი პირადად ჩემთან მოვიდა ციხეში და არა მარტო ჩემთან, ყველა პატიმართან, რომელსაც მაშინდელი რეჟიმი ებრძოდა.

მზია ამაღლობელი ამ ქალაქის, ამ რეგიონის და საქართველოს ისტორიაში არ იმსახურებს ციხეში ყოფნას", — ამბობს თამაზ ბაკურიძე.