18 იანვარს ღამით, რუსთაველის მეტროს მიმდებარედ დაკავებული რატი ტყემალაძე და ოთარ კვარაცხელია ადვოკატებმა დიღმის იზოლატორში მოინახულეს.

როგორც რატი ტყემალაძის ადვოკატი, მარიამ მაღრაძე რადიო თავისუფლებასთან ამბობს, სამართალდამცავებმა ისინი შეცდომით დააკავეს, ეძებდნენ მანიფესტანტს, რომელსაც ფეიერვერკი ჰქონდა, რატი ტყემალაძეს და ოთარ კვარაცხელიას კი ფეიერვერკი არ ჰქონიათ, მაგრამ მაგრამ მაინც დააკავეს.

"სხვა ადამიანების დაკავება ჰქონდათ მიზნად, ეძებდნენ მანიფესტანტს, რომელსაც ჰქონდა ფეიერვერკი და ამ მიზნით რუსთაველის ტერიტორიიდან ზანდუკელამდე აედევნენ. მათ არ ეცვათ პოლიციის ფორმა, ვერ ხდებოდა მათი იდენტიფიცირება, დაკავებულებს ტიტუშკები ეგონათ და შემდეგ გაირკვა, რომ პოლიციელები აკავებდნენ მათ", — ამბობს მარიამ მაღრაძე.

მისი თქმით, დემონსტრანტებმა მხოლოდ დაკავების შემდეგ შეიტყვეს, რომ ისინი პოლიციელები იყვნენ.

"დაკავების საფუძველი არ არსებობდა, აქცია უკვე დამთავრებული იყო და მიდიოდნენ თავისთვის სახლისკენ და აედევნათ სამი ავტომობილი, ეგონათ ტიტუშკები, არც მოწოდება ყოფილა მათი მისამართით და გაიქცნენ. გზა რომ გადაუჭრეს და დააკავეს ამის შემდეგ უთხრეს, რომ პოლიციელები იყვნენ. ჩემი დაცვის ქვეშ მყოფს ეუბნებოდნენ ფეიერვერკი რატომ ისროლეთო. სხვისი დაკავება უნდოდათ და აერიათ, როცა გაირკვა, რომ მათ არ უსვრიათ გადმოიყვანეს მაინც იზოლატორში", — ამბობს ოთარ კვარაცხელიას ადვოკატი დიმიტრი ნოზაძე რადიო თავისუფლებასთან.

ფეისბუქ-ჯგუფ დაიტოვეში, დღეს უფლებადამცველი მარიამ ჯიქია წერს, რომ რატი ტყემალაძე და ოთო კვარაცხელია ნაცემები არ არიან, მაგრამ იყო ფსიქოლოგიური ზეწოლა, ეღიარებინათ სხვადასხვა სამართალდარღვევები. ამას ჯარდა, ისინი იზოლატორში წიგნებს ითხოვენ — რატი ჰაიდეგერის "ყოფიერება და დროს", ოთო კვარაცხელია — ეფლბაუმის "ავტოკრატების გაერთიანებას".

"რატი ტყემალაძე და ოთო კვარაცხელია არიან დიღმის იზოლატორში, არ არიან ნაცემები. მათზე განყოფილებაში იყო ფსიქოლოგიური ზეწოლა ეღიარებინათ სხვადასხვა სამართალდარღვევები. თვალებში ანათებდნენ ლაზერს, ეგრძნოთ როგორი შეგრძნებაა.
რატიმ მოითხოვა ჰაიდეგერის ყოფიერება და დრო, ასევე, ელენე ლადარიას გადაეცი ბოდიში, რომ შუალედური ვერ გავუგზავნეო.

ოთომ — ეფლბაუმის "ავტოკრატების გაერთიანება", ასევე გადმოგვცა, რომ არ ინერვიულოთ, თავისუფლებისთვის 48 საათი აქ ყოფნა რა მოსატანია და მალე შემოგიერთდებითო.
ხვალიდან მათი დაცვის პროცესში ჩაერთვება ცხელი ხაზის ადვოკატი", — წერს მარიამ ჯიქია.