უნგრეთის პრემიერმინისტრი ვიქტორ ორბანი მისი ახლო მოკავშირის და მინისტრის ანტალ როგანის დასანქცირებას გამოეხმაურა. მისი განცხადებით აშშ-ს ხაზინის მიერ დაკისრებული სანქცია მისი კაბინეტის უფროსს ანტალ როგანს მხოლოდ "აძლიერებს". ინფორმაციას ევრონიუსი ავრცელებს.

როგანი, მთავრობის მაღალი რანგის მინისტრია, რომელიც საიდუმლო სამსახურს ზედამხედველობს. აშშ-ს სახაზინო დეპარტამენტი ეჭვობს, რომ ის თანამდებობას იყენებდა იმისთვის, რომ მთავრობასთან დაკავშირებულ ბიზნესმენებთან ხელსაყრელი ბიზნეს გარიგებები დაედო და მისი დასანქცირებაც სავარაუდო კორუფციის გამო მოხდა.

"ის არის ეროვნული უსაფრთხოების სამსახურებზე პასუხისმგებელი მინისტრი, უნგრეთის ეროვნული სუვერენიტეტის ნომერ პირველი მცველი და დიდი ძალის მიერ მისი დასჯა ნიშნავს, რომ ის კარგად ასრულებს თავის საქმეს“, — თქვა ორბანმა სახელმწიფო რადიოში სანქციების საპასუხოდ.