ბათუმის აქციების მედროშემ, თემურ ქათამაძემ, რომელიც პოლიციამ ორჯერ დააკავა, დღეს, 17 იანვარს, შიმშილობა დაიწყო. ინფორმაციას "ბათუმელებს" მისი ადვოკატი დარეჯან სალდაძე უდასტურებს. თემურ ქათამაძის უფლებებს საია იცავს.

თემურ ქათამაძე გუშინ, 16 იანვარს, ადმინისტრაციული პატიმრობიდან გათავისუფლების შემდეგ, რამდენიმე წუთში ისევ დააკავეს. ამჯერად პოლიცია მას საქართველოში ცხოვრების უფლების არქონას ედავება.

თემურ ქათამაძე ქართველი მუჰაჯირების შთამომავალია, იგი წლებია საქართველოში ცხოვრობს და მოქალაქეობას ითხოვს.

"დაკავების დღიდან შიმშილობს, მხოლოდ წყალს სვამს და საკვებზე უარს ამბობს. ის მანამდე აპირებს შიმშილობას, სანამ მის საქმეზე კონკრეტული შედეგი არ დადგება. თუმცა ჯერ სასამართლო პროცესი ჩანიშნული არ არის, ოფიციალურად რაიმე წერილი ჩაბარებული არ აქვს და არც იმაზე მოუწოდებიათ ინფორმაცია, როდის შეიძლება ჩაინიშნოს პროცესი“ — ამბობს ადვოკატი.

შს სამინისტროში "ბათუმელებს" უთხრეს, რომ ბათუმის აქციების მედროშე, თემურ ქათამაძე, ადმინისტრაციული პატიმრობიდან გათავისუფლების შემდეგ იმიტომ დააკავეს, რომ ის საქართველოში "არალეგალურად, სამართლებრივი საფუძვლის გარეშე“იმყოფება.

„ფაქტზე დაიწყო შესაბამისი სამართალწარმოება, რის შემდგომაც გატარდა კანონმდებლობით განსაზღვრული ზომები და „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონის 64-ე მუხლის შესაბამისად დაკავდა“ – ამბობენ შს სამინისტროში.

ადვოკატის თქმით, თემურ ქათამაძე მის დაკავებას საპროტესტო აქციებზე აქტივობას უკავშირებს.