რადიო თავისუფლების ცნობით, ბათუმელები/ნეტგაზეთის დამფუძნებლისა და დირექტორისთვის, მზია ამაღლობელისთვის, პატიმრობის შეფარდების საკითხზე ქუთაისის სააპელაციო სასამართლო იმსჯელებს. სააპელაციო საჩივარი სასამართლოში 15 იანვარს შევიდა.

"შემთხვევის ადგილას სამართალდამცველების დიდი რაოდენობა იმყოფებოდა და თუ ვინმეს მოწმის სტატუსი აქვს, შეუძლებელია, ობიექტურად, მზია ამაღლობელმა ზემოქმედება იქონიოს მათზე. მზიას ქმედება კი ვერ შეფასდება თავდასხმად. მიუხედავად ამისა, ბრალდების ეს ვერსიაც სასამართლომ დასაბუთების გარეშე გაიზიარა“, — განაცხადა მზია ამაღლობელის ადვოკატმა გიორგი ხიმშიაშვილმა

მზია ამაღლობელის აღკვეთის ღონისძიების შესახებ მოსაზრება წარუდგინა ქუთაისის სააპელაციო სასამართლოს სახალხო დამცველის აპარატმაც. ომბუდსმენის აპარატის განცხადებით, მსგავსი ფორმით თავისუფლების შეზღუდვა დაუშვებელია.

"დოკუმენტში საუბარია აღკვეთის ღონისძიების სახით გამოყენებული პატიმრობის დასაბუთების ხარვეზებზე და უფლებრივი სტანდარტების ანალიზის ფონზე, განხილულია, რომ დაუშვებელია მხოლოდ აბსტრაქტულ და პოტენციურ საფრთხეებზე დაყრდნობით პირისთვის თავისუფლების ამგვარი ინტენსიური შეზღუდვა", — აცხადებს სახალხო დამცველის პრესსამსახური.

მზია ამაღლობელი ბათუმში აქციაზე 12 იანვარს დააკავეს. მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს, რაც 4-დან 7 წლამდე პატიმრობას ითვალისწინებს.

ამ აქციაზე მზია ამაღლობელი ორჯერ დააკავეს – თავდაპირველად 11 იანვრის ღამეს, კედელზე პლაკატის გაკვრის გამო. მოგვიანებით ის გაათავისუფლეს. გათავისუფლებიდან მალევე, აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს 2 სხვა პირთან ერთად.

მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს, რაც 4-დან 7 წლამდე პატიმრობას ითვალისწინებს.

14 იანვარს მზია ამაღლობელს ბათუმის საქალაქო სასამართლომ წინასწარი პატიმრობა შეუფარდა.